ក្រុមហ៊ុនផលិតរថយន្ត Toyota បានប្រកាសឱ្យដឹងថា រថយន្តម៉ូដែល Previa របស់ខ្លួននឹងត្រូវបានអភិវឌ្ឈ៏ឡើងវិញជារថយន្ត Minivan អគ្គិសនី ហើយគ្រោងនឹងប្រកាសចេញជាផ្លូវការនៅក្នុងឆ្នាំ២០២៦ ខាងមុខនេះ ដោយផ្តល់ជូននូវជម្រើស EV និង PHEV ដើម្បីបំពេញតម្រូវការប្រើប្រាស់របស់អតិថិជន។
គួរបញ្ជាក់ថា រថយន្តនេះ នឹងក្លាយជារថយន្ត Minivan អគ្គិសនីដំបូងបំផុតរបស់ក្រុមហ៊ុន Toyota ដែលមានគោលដៅច្បាស់លាស់ក្នុងការចូលទីផ្សារបច្ចេកវិទ្យា និងអន្តរជាតិ សម្រាប់ជំរុញការលក់នៅក្នុងទីផ្សារអាស៊ីអាគ្នេយ៍ អឺរ៉ុប និងទីផ្សារចម្បងផ្សេងៗ។
សម្រាប់រថយន្ត Previa EV នឹងមានការរចនារូបរាងស្រដៀងនឹងស៊ុតដូចម៉ូដែលដើម ដែលជាការរចនាដែលធ្វើឱ្យមានលក្ខណៈប្លែក និងឌីណាមិចសម្រាប់ការបើកបរ។ លើសពីនេះ រថយន្ត Minivan នេះ នឹងទទួលបានជម្រើស EV និង Plug-in Hybrid (PHEV) ដែលជម្រើស PHEV នឹងមានសមត្ថភាពបើកបរបានចម្ងាយដល់ ៧៣ គីឡូម៉ែត្រ ដោយប្រើថាមពលអគ្គិសនីសុទ្ធ។
មិនតែប៉ុណ្ណោះ រថយន្តនេះ នឹងផលិតឡើងនៅលើគ្រោងឆ្អឹង GA-K ដែលត្រូវបានប្រើសម្រាប់ម៉ូដែល Crown, Camry និង RAV-4 ជំនួសវិញឲការប្រើប្រាស់នូវគ្រោងឆ្អឹង e-TNGA ដែលបំពាក់នៅលើរថយន្តអគ្គិសនី bZ4X របស់ពួកគេ៕
