ក្រុមហ៊ុនតូយ៉ូតា បានបញ្ចេញរថយន្ត RAV4 Adventure សម្រាប់ទីផ្សារអឺរ៉ុបជាមួយរូបរាងលេងខ្លួនកាន់តែទាក់ទាញខ្លាំង រួមជាមួយការផ្លាស់ប្តូរមុខងារខ្លះៗហើយនេះជាលើកទីមួយផងដែរ។ រថយន្ត Toyota RAV4 Adventure ២០២២ រចនាផ្នែកខាងមុខ ដូចគ្នាទៅនឹងម៉ូដែលសម្រាប់ទីផ្សារអាមេរិច ប៉ុន្តែមានចំនុចខុសគ្នាទៅលើប៉ាណា សំណាញ់ខ្យល់ និងរបាការពារខាងផ្នែកក្រោម មុខ និងក្រោយពណ៌ទឹកប្រាក់។
គួររំលឹកផងដែរថា ការរចនានេះដូចគ្នាទៅនឹងរថយន្តគំរូ Toyota FT-AC ២០១៧ ដើម្បីបង្ហាញពីការផ្លាស់ប្តូរនៃជំនាន់ទី៤ របស់រថយន្ត RAV4។ ការរចនាឡើងវិញថ្មីទៅលើចង្កៀងមុខ និងអំពូលកាត់អ័ព្ទ LED យ៉ាងពិសេសសម្រាប់ទីផ្សារនោះ។ សម្រាប់ប្រភេទ Adventure ឬយើងហៅថាផ្សងព្រេងនេះ ត្រូវបានលេងខ្លួនជាមួយពណ៌បែបគគី ឬហៅថាប្រផេះ ជាពីរពណ៌លាយគ្នាដូចទៅនឹងរថយន្ត FJ40 Land Cruiser និងថាសកង់ធំពណ៌ប្រផេះគ្រឿមទំហំ ១៩អុីញ។ សម្រាប់ម៉ាស៊ីនប្រភេទសាំងហាយព្រីត និងធម្មតា ក្រុមហ៊ុនតូយ៉ូតា បានរចនាថាសកង់ជា២ប្រភេទ មាន ១០ប្រឡោះ ដោយពណ៌ទឹកប្រាក់បែបភ្លឺ (ប្រភេទលំដាប់កណ្តាល) និងខ្មៅរលោង (ប្រភេទលំដាប់ខ្ពស់)។
ចូលមកដល់ផ្នែកខាងក្នុងវិញ ត្រូវបានរៀបចំជាមួយពណ៌ខ្មៅ ពួកស្បែករំលេចដោយថ្នេរដេរពណ៌ទឹកក្រូច រួមជាមួយបរិក្ខាបំពាក់យ៉ាងប្រណិត ផ្តល់នូវអារម្មណ៌ស្រស់ស្រាយ។ រថយន្តនេះដំណើរការដោយម៉ាស៊ីនសាំងហាយប្រ៊ីតជំនាន់ទី៤ ២,៥លីត្រ កម្លាំង ២១៩សេះ កម្លាំងរមួល ២២១ញ៉ូតុនម៉ែត្រ ប្រើប្រាស់បច្ចេកវិទ្យាបើកបរប៉ុង២ ប្រភេទ AWD-i system។
