តាមការចុះផ្សាយរបស់សារព័ត៌មានក្នុងស្រុកចិនបានឲ្យដឹងថា Xiaomi ដែលជាក្រុមហ៊ុនផលិតស្មាតហ្វូនធំមួយរបស់ចិន កំពុងសំងំផលិតរថយន្តអគ្គិសនី ដែលគម្រោងការផលិតនេះគឺមានការដឹកនាំដោយលោក Lei Jun ជានាយកប្រតិបត្តិ Xiaomi ផ្ទាល់ ដើម្បីធានាថាគម្រោងការនេះអាចសម្រេចទៅបានតាមការរំពឹងទុក។
រថយន្តអគ្គិសនីដំបូងរបស់ Xiaomi នឹងជាប្រភេទរថយន្តអគ្គិសនីលំដាប់ខ្ពស់ មានតម្លៃថ្លៃ និងមានបច្ចេកវិទ្យាទំនើបឈានមុខ។ ក្រៅពីការលក់រថយន្តក្នុងស្រុកហើយនោះ Xiaomi ក៏មានគម្រោងលក់រថយន្តអគ្គិសនីដំបូងរបស់ខ្លួននៅទូទាំងពិភពលោកផងដែរ។
គួរដឹងថាខណៈដែលមានការលេចលឺថា Apple បានជួបពិភាក្សាជាមួយ Kia ដើម្បីពឹងផ្អែកឲ្យផលិតរថយន្តអគ្គិសនីដំបូងនោះ Xiaomi ឯណេះវិញក៏បានរកពឹងពាក់លើក្រុមហ៊ុន Nio ដែលជាក្រុមហ៊ុនជំនាញខាងផលិតរថយន្ត SUV អគ្គិសនីប្រណីត, រថយន្ត Sedan និងរថយន្ត EP9 ផងដែរ។ បន្ថែមពីនេះ Xiaomi ក៏បានទៅជួបពិភាក្សាជាមួយក្រុមហ៊ុនក្នុងស្រុកដទៃទៀតដូចជា BYD ផងដែរ៕
