បន្ទាប់ពីត្រូវបានពន្យាពេលអស់ជាច្រើនលើក ទីបំផុតរថយន្តអគ្គសនី Rivian R1T បានចាប់ផ្តើមចូលរោងចក្រផលិតនៅសហរដ្ឋអាមេរិច ខណៈរថយន្តភីកអាប់នេះជាគូរប្រជែង របស់ Ford F-150 Lightning, Tesla Cybertruck និង Hummer EV ផងដែរ។
នេះបើតាមការ Tweet របស់ស្ថាបនិក និង CEO ក្រុមហ៊ុនលោក RJ Scaringe បាននិយាយថា៖ បន្ទាប់ពីបានផលិតគំរូរថយន្តកាលពីច្រើនខែកន្លងទៅ នៅព្រឹកនេះរថយន្តគ្រឿងដំបូងរបស់អតិថិជនរបស់យើងកំពុងដំណើរការផលិតធម្មតា។ កិច្ចប្រឹងប្រែងរួមរបស់ពួកយើង បានធ្វើអោយពេលវេលានេះកើតឡើងបាន។ ពិតជាមិនអាចរង់ចាំបានឡើងក្នុងការប្រគល់រថយន្តគ្រឿងដំបូងដល់អតិថិជនរបស់ពួកយើង។
គួររំលឹកផងដែរថា រថយន្តភីកអាប់ R1T ត្រូវបានក្រុមហ៊ុនបង្ហាញចេញកាលពីឆ្នាំ២០១៨ក្នុងកម្មវិធីតាំងបង្ហាញរថយន្ត Los Angeles Auto Show និងបានប្រកាសចេញលក់ក្នុងឆ្នាំ២០២០ ប៉ុន្តែគួរអោយស្តាយដោយសារកូវីដ១៩ និងរង់ចាំការអនុម័តពីរដ្ឋាភិបាលផង បានធ្វើអោយក្រុមហ៊ុនពន្យាពេលជាច្រើនលើក។
សម្រាប់រថយន្ត Rivian R1T ផ្តល់នូវជម្រើស ៣ម៉ូឌែលគឺ Launch Edition តម្លៃ ៧៣ ០០០ដុល្លារ, Adventure និង Exploreតម្លៃចាប់ពី ៦៧ ៥០០ដុល្លារ និងសម្ថភាពអាចបើកបរបានចម្ងាយ ៥០៥គីឡូម៉ែត្រ បើតាមការចេញតួរលេខពីស្ថាប័ន EPA៕
