នាពេលបច្ចុប្បន្នរថយន្តភីកអាប់ខ្នាតកណ្តាលបានក្លាយជាជម្រើសដ៏ពេញនិយមក្នុងការជ្រើសរើសមកប្រើប្រាស់ ហើយកាលពីថ្មីៗនេះ ក្រុមហ៊ុន Chevrolet បានប្រកាសចេញភីកអាប់ខ្នាតកណ្តាលថ្មី នោះគឺ Chevrolet Colorado ឆ្នាំ២០២៣ ដែលបានឌីហ្សាញរូបរាងថ្មី ហើយមានសមត្ថភាពខ្លាំងជាងមុន ថែមទាំងទំនើបជាងមុនទៀតផង។
១) ការរចនាផ្នែកខាងក្រៅ
សម្រាប់ម៉ូឌែលឆ្នាំ ២០២៣នេះ Chevrolet បានផ្តល់អោយរថយន្តសេរ៊ីថ្មីរបស់ខ្លួនជាមួយគ្រោងឆ្អឹងថ្មី និងបានបញ្ចូល DNA របស់ម៉ូដែល Silverado ប៉ុន្តែបានប្រើបំពាក់ចង្កៀងមុខ និងប៉ាណាមុខ បែបផ្ទាល់ខ្លួន មិនឲ្យច្រលំគ្នានោះទេ។ ដោយក្នុងនោះរថយន្តនេះមានចំនួណ ៥ជម្រើសម៉ូឌែលផ្សេងៗគ្នាដោយមាន WT, LT, Z71, ZR2 និងម៉ូឌែលថ្មី Trail Boss។
បន្ថែមពីនេះ គ្រប់ម៉ូដែលទាំងអស់ដែលបានបង្កើតឡើងនៅលើតួគ្រោងឆ្អឹងថ្មីនេះបានផ្តល់រថយន្ត Colorado ឆ្នាំ 2023 នូវប្រវែងនៃគម្លាតក់វែងជាងម៉ូឌែលបច្ចុប្បន្នចំនួន ៣,១អ៊ីញ។ អ្វីដែលពិសេសនោះគឺ វាក៏មានឈ្នាន់ជើងចំហៀង សម្រាប់ឡើងទ្រុងផ្នែកខាងក្រោយដែលមានប្រវែង ១,៥ម៉ែត្រ ទៀតផង។
សម្រាប់ការអូសទាញនៃរថយន្ត Colorado បានផ្តល់ជូននូវការអូសទាញទម្ងន់ធ្ងន់ផុតនៅក្នុងផ្នែកភីកអាប់ទំហំមធ្យម ដែលមានសមត្ថភាពអតិបរមា ៣ ៤៩២គីឡូក្រាម។ ខណៈពេលដែលម៉ូឌែល WT និង LT មានកម្លាំង ២៣៧សេះ អាចអូសសណ្តោងបានទម្ងន់ ១ ៥៨៧គីឡូក្រាម, Colorado Z71 និង Trail Boss អាចទាញបានរហូតដល់ ៣ ៤៩២គីឡូក្រាម និង Colorado ZR2 បានទម្ងន់ ២ ៧២១គីឡូក្រាម។
២) ការរចនាផ្នែកខាងក្នុង
ចូលទៅផ្នែកខាងក្នុងវិញ វាបំពាក់កុងទ័រឌីជីថលទំហំ ៨អ៊ីញ និង អេក្រង់កម្សាន្តទំហំ ១១,៣អ៊ីញ ខណៈអេក្រង់នោះអាចបង្ហាញព័ត៌មាន Off-road Performance ដូចជា ស្ថានភាពផ្លូវ និង សម្ពាធកង់ ជាដើម។
បន្ថែមពីនេះ វាក៏មាន Option មួយចំនួនទៀត ដូចជា ពូកស្បែករំលេចដោយថ្នេរដេរពណ៌ក្រហម ហើយមានមុខងារកម្តៅ និងអាចសារ៉េបាន ៨បែប, ប្រព័ន្ធសោរ Remote Keyless Entry, ប្រព័ន្ធសំឡេងមាន Speaker ៦គ្រាប់, កន្លែងសាកថ្មទូរសព្ទឥតប្រើខ្សែ, ប្រព័ន្ធម៉ាស៊ីនត្រជាក់ ២តំបន់ និងកន្លែងដាក់ឥវ៉ាន់នៅក្រោមកៅអីក្រោយ ជាដើម។
៣) ប្រព័ន្ធសុវត្ថិភាព និងជំនួយការបើកបរ
Chevrolet Colorado ២០២៣ មានបំពាក់ប្រព័ន្ធសុវត្ថិភាពជាច្រើន រួមទាំង
- ប្រព័ន្ធជាន់ហ្រ្វាំងបន្ទាន់ដោយស្វ័យប្រវត្តិក្នុងលក្ខខណ្ឌមានមនុស្ស ឬកង់ឆ្លងកាត់ Automatic Emergency Braking
- ប្រព័ន្ធផ្តល់ដំណឹងពេលមានឧបសគ្គខាងមុខ Forward Collision Alert
- ប្រព័ន្ធជាន់ហ្រ្វាំងបន្ទាន់ពេលមានអ្នកថ្មើជើងឆ្លងកាត់នៅផ្នែកខាងមុខ Front Pedestrian Braking
- ប្រព័ន្ធធ្វើការដំឡើង និងទំលាក់ (ហ្វា/កូដ)ភ្លើងដោយស្វ័យប្រវត្តិដ៏ឆ្លាតវៃ IntelliBeam headlights
- ប្រព័ន្ធរក្សារថយន្តអោយបើកបរក្នុងគន្លងផ្លូវ Lane Keep Assist
- ប្រព័ន្ធផ្តល់សញ្ញាដោយស្វ័យប្រវត្តិដល់អ្នកបើកបរ អំពីហានិភ័យនៃរថយន្ត ដែលវ៉ាពីខាងក្រោយ Lane Departure Warning
- ប្រព័ន្ធបញ្ជារកំណត់ល្បឿនបើកបរ ដោយស្វ័យប្រវត្តិតាមរថយន្តដែលនៅពីមុខ ដែលអនុញ្ញាតអោយយើងអាចធ្វើការកំណត់ល្បឿនបើកបរដោយស្វ័យប្រវត្តិ និងការផ្លាស់ប្តូរល្បឿនទៅតាមស្ថានភាពផ្លូវ Adaptive Cruise Control
- ប្រព័ន្ធជាន់ហ្វ្រាំងបន្ទាន់នៅពេលមានឧបសគ្គ ឬអ្នកឆ្លងកាត់នៅផ្នែកខាងក្រោយ Rear Cross Traffic Braking
- ប្រព័ន្ធផ្តល់ដំណឹងដើម្បីជួយអ្នកបើកបរជៀសវាងគ្រោះថ្នាក់ជាមួយអ្នកថ្មើរជើងនៅពេលថយក្រោយ Rear Pedestrian Alert
៤) ថាមពលម៉ាស៊ីន
សម្រាប់ម៉ាស៊ីននៃ រថយន្តភីកអាប់នេះ Chevrolet បាននិយាយថាម៉ាស៊ីនថ្មីនេះមានសម្ថភាពខ្លាំងជាមុនទាំងកម្លាំងសេះ និងកម្លាំងបង្វិលជុំ ដោយក្នុងនោះ Colorado ២០២៣ ប្រើម៉ាស៊ីន ៣ ជម្រើស គឺចំណុះ ២,៧លីត្រ Turbo ទំហំ ៤ស៊ីឡាំង៖
- កម្លាំង ២៣៧សេះ និងកម្លាំងរមួល ៣៥១ញ៉ូតុនម៉ែត្រ សម្រាប់ម៉ូឌែល WT និង LT
- កម្លាំង ៣០១សេះ និងកម្លាំងរមួល ៥២៨ញ៉ូតុនម៉ែត្រ សម្រាប់ម៉ូឌែល Z71 និង Trail Boss
- និងកម្លាំង ៣១០សេះ និងកម្លាំងរមួល ៥៨២ញ៉ូតុនម៉ែត្រ សម្រាប់ម៉ូឌែល ZR2
បន្ថែមពីនេះរថយន្តភីកអាប់ខ្នាតកណ្តាលនេះមានកម្រិតស៊ីប្រេងជាមធ្យម ១២លីត្រ/១០០គីឡូម៉ែត្រ និងមានជម្រើសនៃម៉ូដបើកបរចំនួន ៥ គឺ Normal, Tow/Haul, Off-road, Terrain និង Baja។
៥) តម្លៃ
Chevrolet Colorado ឆ្នាំ២០២៣ នឹងត្រូវដាក់លក់ក្នុងតម្លៃចាប់ពីខ្ទង់ វានឹងមានតម្លៃចាប់ពីខ្ទង់ ២៨០០០ដុល្លារ នៅពេលចេញលក់ជាផ្លូវការ នៅពាក់កណ្តាលឆ្នាំ២០២៣៕
