[ទីផ្សារបរទេស] ក្រុមហ៊ុនផលិតរថយន្ត Lexus នៅសហរដ្ឋអាមេរិក គ្រោងនឹងផលិតរថយន្ត Lexus TX ម៉ូដែលថ្មី ដែលជាប្រភេទ SUV ខ្នាតធំបីជួរ ជាដៃគូប្រកួតប្រជែងជាមួយ Mercedes-Benz GLS និង BMW X7 ត្រូវបានគេនិយាយថាមានទំហំធំជាង Lexus RX L អាចនឹងត្រូវបានបង្ហាញក្នុងពេលឆាប់ៗនេះ។
យោងតាមប្រភពដែលមិនបញ្ចេញឈ្មោះបានប្រាប់គេហទំព័រ Autonews ថារថយន្ត SUV បីជួរនឹងប្រើប្រាស់គ្រោងឆ្អឹងដូចគ្នាទៅនឹងរថយន្ត Toyota Grand Highlander ដែលមានវត្តមាននៅពេលខាងមុខ ដែលជាប្រភេទបន្ថែមរបស់ Highlander ដែលពួកគេបាននិយាយថានឹងដាក់លក់នៅអាគារតាំងបង្ហាញនៅសហរដ្ឋអាមេរិកនៅពាក់កណ្តាលឆ្នាំ ២០២៣ ខណៈ TX នឹងមកដល់ប្រហែលប្រាំមួយខែបន្ទាប់ពីរថយន្តនេះ។
ទោះបីជារថយន្តទាំងពីរមិនត្រូវបានប្រកាសជាផ្លូវការក៏ដោយក៏ Toyota ដែលជាម្ចាស់ Lexus បានប្តេជ្ញាចិត្តវិនិយោគទឹកប្រាក់ចំនួន ៨០៣ លានដុល្លារដើម្បីធ្វើបច្ចុប្បន្នភាពរោងចក្រដំឡើង Princeton រដ្ឋ Indiana របស់ខ្លួន ដែលជាកន្លែងដែលប្រភពបាននិយាយថារថយន្ត SUV ទាំងពីរនឹងត្រូវបានផលិត។
គួរឲ្យដឹងថា នៅពេលដែលក្រុមហ៊ុន Toyota បានប្រកាសពីការវិនិយោគនៅក្នុងរោងចក្រកាលពីឆ្នាំមុន បាននិយាយថារថយន្តទាំងពីរដែលផលិតនៅទីនោះនឹងមាន “ប្រព័ន្ធបើកបរពាក់កណ្តាលស្វ័យប្រវត្តិដែលនឹងអនុញ្ញាតឲ្យបើកបរដោយមិនប្រើដៃក្នុងលក្ខខណ្ឌមួយចំនួន ប្រព័ន្ធចតរថយន្តពីចម្ងាយដែលអនុញ្ញាតឲ្យអ្នកបើកបរចត និង ឈប់ចតពីខាងក្រៅរថយន្តដោយប្រើស្មាតហ្វូន ហើយសោឌីជីថលដែលប្រែស្មាតហ្វូនរបស់អ្នកប្រើប្រាស់ទៅជាសោរបស់ពួកគេ ហើយអនុញ្ញាតឲ្យពួកគេចែករំលែកវាតាមឌីជីថល។
យោងតាមលោក John Iacono ដែលជាប្រធានក្រុមប្រឹក្សាអ្នកចែកចាយ Lexus ដែលបាននិយាយទៅកាន់គេហទំព័រ AN ថា អ្នកចែកចាយរបស់ម៉ាកយីហោនេះចង់បានរថយន្តប្រភេទ SUV ដែលមានទំហំធំជាង RX L ដែលមិនតម្រូវឲ្យអតិថិជនទិញរថយន្តប្រភេទ SUV ដែលមានតួខ្លួនដូចរថយន្ត GX និង LX SUVs នោះទេ។
គួរបញ្ជាក់ផងដែរថា សម្រាប់ព័ត៌មានលម្អិតបន្ថែមទៀតអំពីរថយន្តនេះ ក្រុមហ៊ុន Lexus មិនបានធ្វើការអត្ថាធិប្បាយ ឬឆ្លើយតបនៅឡើយទេ៕
