[បរទេស] កាលពីពេលថ្មីៗ កន្លងទៅនេះ យោងតាមគេហទំព័រ Whocar.com.au បានបញ្ចេញរូបថតនៃការធ្វើតេស្តសាកល្បងសម្រាប់រថយន្តភីកអាប់ Toyota Tundra ត្រូវបានគេរំពឹងថាជាម៉ូដែល Capstone ថ្មី ដែលត្រូវបានបំលែងទៅជាចង្កូតខាងស្តាំក្នុងប្រទេសអូស្ត្រាលី។
Toyota Tundra Capstone បានធ្វើការបើកបរតេស្តសាកល្បងជាមួយសមត្ថិភាពអូសសណ្តោងក្នុងប្រទេសអូស្ត្រាលី ដែលមានការបិទបាំងតួខ្លួន។ ប៉ុន្តែត្រូវបានមើលឃើញថា មានលក្ខណៈដូចគ្នាស្ទើរតែទាំងស្រុងទៅនឹងម៉ូដែលរបស់សហរដ្ឋអាមេរិក សូម្បីតែថាសកង់ស្ព័រទំហំ ២២ អ៊ីញ។
ក្រុមហ៊ុន Toyota ប្រចាំនៅប្រទេសអូស្រ្តាលី កំពុងចាប់ដៃគូជាមួយក្រុមហ៊ុន Walkinshaw Automotive Group ជាក្រុមហ៊ុនតែមួយដែលនៅពីក្រោយការបំប្លែងចង្កូតខាងស្តាំនៃ Ram និង Chevrolet សម្រាប់គម្រោងរថយន្តភីកអាប់ Toyota Tundra ខ្នាតធំ លើការកែប្រែចង្កូតខាងស្តាំ ហើយបានបញ្ជាក់ថាវានឹងចេញនៅចន្លោះឆ្នាំ ២០២៣ និង ២០២៤ ។
មិនត្រឹមតែប៉ុណ្ណោះ Toyota និង Walkinshaw នឹងចាប់ផ្តើមផលិតគំរូ Tundra ប្រហែល ៣០០ គ្រឿង ក្នុងរយៈពេល ១២ ខែខាងមុខ។ នេះធានាថាការបម្លែងត្រូវនឹងស្តង់ដារដែលអតិថិជនរំពឹងទុកពីក្រុមហ៊ុននេះ។
គួរបញ្ជាក់ផងដែរ សម្រាប់រថយន្ត Toyota Tundra Capstone ប្រើប្រាស់នៅម៉ាស៊ីនចំណុះ ៣,៥ លីត្រ V6 Twin-Turbo អាចផលិតកម្លាំងបាន ៣៨៩ សេះ និងកម្លាំងរមួល ៦៤៩ ញ៉ូតុនម៉ែត្រ។ ខណៈពេលដែលម៉ាស៊ីនប្រភេទ i-Force Max hybrid ផ្គួបជាមួយម៉ូទ័រអគ្គិសនីមានកម្លាំង ៤៣៧ សេះ និងកម្លាំងរមួល ៧៩០ ញ៉ូតុនម៉ែត្រ ភ្ជាប់ដោយប្រអប់លេខស្វ័យប្រវត្តិ ១០ វគ្គ៕
