រថយន្ត Deepal L06 របស់ក្រុមហ៊ុន Changan បានក្លាយជារថយន្តផលិតនៅប្រទេសចិនដំបូងគេបង្អស់ ដែលប្រើប្រាស់ប្រព័ន្ធកង់ម៉ាញេទិក MagneRide® ជំនាន់ទី ៤ របស់ BWI Group ដែលត្រូវបានប្រើនៅក្នុងរថយន្តកំពូលដូចជា Ferrari Lamborghini, និង Cadillac។ ប្រព័ន្ធបូមនេះអាចលៃតម្រូវការទប់ទល់រំញ័រ (damping) បាន ១ ០០០ ដងក្នុង ១ វិនាទី ដែលផ្តល់នូវការបើកបរកម្រិតដូចរថយន្ដ Supercar ។
សម្រាប់ប្រព័ន្ធបច្ចេកវិទ្យានេះត្រូវបានបំពាក់លើរថយន្ដទំនើបៗជាច្រើនដូចជា Ferrari 458 Italia, Lamborghini Huracán, Mustang Mach-E, Shelby GT 350, Cadillac ATS, Chevrolet Corvette, Audi TT និង R8។ បើនិយាយពីរឿងបូមគឺពិសេសហើយ តែអ្វីដែលពិសេសគឺតម្លៃរបស់រថយន្ដនេះតែម្ដង Deepal L06 ត្រូវបានបង្ហាញខ្លួននៅថ្ងៃទី ១៨ ខែវិច្ឆិកា ឆ្នាំ ២០២៥ ត្រូវបានដាក់លក់ជាមួយតម្លៃចាប់ពី ១៨ ៨០០ ទៅ ២១ ៨០០ ដុល្លារ នៅក្នុងទីផ្សារប្រទេសចិន។
Deepal L06 ផ្ដល់មកជាជម្រើស២ម៉ូឌែលផ្សេងគ្នាមានទាំងជម្រើសប្រើអគ្គិសនីសុទ្ធ BEV និងអគ្គិសនីលាយសាំង EREV។ សម្រាប់ម៉ូឌែលប្រើអគ្គិសនីសុទ្ធ ដំណើរការដោយម៉ូទ័រអគ្គិសនីចំនួន១ នៅផ្នែកខាងក្រោយអាចផលិតកម្លាំងបាន ២០០គីឡូវ៉ាត់ ឬស្មើនិង ២៦៨ សេះ ផ្តល់ជូនរយៈចម្ងាយបើកបរ ៦៧០ គីឡូម៉ែត្រ គិតតាមស្ដង់ដារវាស់ចម្ងាយ CLTC និងអាចសាកថ្ម ៣០% ទៅ ៨០% ក្នុងរយៈពេល ១៥ នាទី។
ចំពោះជម្រើសប្រើអគ្គិសនីលាយសាំង EREV ដំណើរការដោយម៉ាសុីនចំណុះ ១.៥ លីត្រ អាចផលិត (៧២ គីឡូវ៉ាត់) ដើរតួនាទីជាម៉ាសុីនសាកថ្ម រួមបញ្ចូលជាមួយម៉ូទ័រអគ្គិសនីអាចផលិតបាន ១៧៥ គីឡូវ៉ាត់ ឬស្មើនិង ២៣៥ សេះ បំពាក់មកជាមួយអាគុយទំហំ ២៨.៣៩ គីឡូវ៉ាត់ម៉ោង ផ្តល់ជូនចម្ងាយដោយប្រើថាមពលអគ្គិសនីសុទ្ធបាន ២៤០ គីឡូម៉ែត្រ ខណៈបើប្រើអគ្គិសនីលាយសាំងអាចបើកបានដល់ ១ ៥០០ គីឡូម៉ែត្រ។
ចំពោះទំហំរូបរាងនៅផ្នែកខាងក្រៅ រថយន្ដនេះមានប្រវែងតួខ្លួនសរុប ៤ ៨៣០ មីលីម៉ែត្រ ទទឹង ១ ៩០៥ មីលីម៉ែត្រ កម្ពស់ ១ ៤៨០ មីលីម៉ែត្រនិងមានប្រវែងគម្លាតកង់មុខក្រោយុ ២ ៩០០ មីលីម៉ែត្រ។ នៅខាងផ្នែកខាងក្នុងរថយន្ត L06 រចនារាងអក្សរ T ភ្ជាប់មកជាមួយសម្ភារទន់ដែលគ្របដណ្ដប់លើសពី ៩០%, លេងបន្ថែមជាមួយចង្កូតបីកំណាត់ បំពាក់មកជាមួយអេក្រង់កម្សាន្ដទំហំ ១៥.៦ អុីញ និងភ្ជាប់មកជាមួយមុខងារ AR-HUD ទំហំ៥០ អុីញ។
ចំពោះកៅអីរថយន្ដ Deepal L06 ផ្តល់ការទ្រនៅផ្នែកចំហៀងទំហំ ៩១.៧ មីលីម៉ែត្រ សម្រាប់ផ្តល់អារម្មណ៍ដូចជាអ្នកកំពុងបើកបររថយន្ដប្រណាំង បន្ថែមមកជាមួយភ្លើងលម្អក្នុងរថយន្ដចំនួន ២៥៦ ពណ៌ ដើម្បីផ្ដល់នូវបរិយាកាសកម្សាន្ដដល់សំបូរបែបដល់អតិថិជន។បន្ថែមពីនេះរថយន្ត L06 ត្រូវបានបំពាក់ដោយ បន្ទះឈីប 3nm ហើយភ្ជាប់មកជាមួយ LiDAR ជាស្តង់ដារ ដោយគាំទ្រមុខងារបើកបរ (autopilot) ទាំងក្នុងទីក្រុង និងលើផ្លូវហាយវ៉េ តាមរយៈការអភិវឌ្ឍរួមគ្នាជាមួយក្រុមហ៊ុន Horizon Robotics។
