ស្របពេលដែលរយៈពេលប៉ុន្មានឆ្នាំចុងក្រោយនេះ ការប្រកួតប្រជែងរវាងក្រុមហ៊ុនផលិតរថយន្តអគ្គិសនីធំៗជាច្រើននៅលើពិភពលោកបានក្លាយជាប្រធានបទក្តៅនៅក្នុងឧស្សាហកម្មយានយន្ត ជាពិសេសរវាងក្រុមហ៊ុន BYD របស់ចិន និងក្រុមហ៊ុន Tesla របស់អាមេរិក ពេលនេះ ប្រវត្តិសាស្រ្តដែលតែងតែមានចុះថា Tesla ជាក្រុមហ៊ុនផលិតរថយន្តអគ្គិសនីទី ១ នៅលើពិភពលោក បានផ្លាស់ប្តូរថ្មីហើយ ដោយក្នុងនោះ គឺបានជំនួសមកវិញ ដោយក្រុមហ៊ុន BYD របស់ចិន។
ក្នុងនោះ យោងតាមទិន្នន័យក្នុងឆ្នាំ២០២៥ នេះ (គិតពីដើមឆ្នាំ រហូតដល់ត្រីមាសទី ៣) ការលក់រថយន្តអគ្គិសនីសុទ្ធរបស់ក្រុមហ៊ុន BYD គឺមានចំនួនដល់ទៅ ១,៦០៥៩លានគ្រឿងឯណ្ណោះ ចំណែក Tesla វិញ គឺមានចំនួនត្រឹមតែ ១,២១៧៩លានគ្រឿងប៉ុណ្ណោះ ខណៈចំនួននេះគឺមានធ្វើឲការលក់រថយន្តអគ្គិសនីសុទ្ធរបស់ BYD លើស Tesla ប្រមាណដល់ទៅ ៣៨៨ ០០០គ្រឿងឯណ្ណោះ។
ជាមួយគ្នានេះ បើនិយាយពីការលក់នៅក្នុងត្រីមាសទី ៣ វិញ BYD គឺបានលក់រថយន្តអគ្គិសនីសុទ្ធរបស់ខ្លួនបានចំនួនដល់ទៅ ៥៨២ ៥០០គ្រឿងឯណ្ណោះ ចំណែក Tesla វិញ គឺមានចំនួនត្រឹមតែ ៤៩៧ ១០០គ្រឿងប៉ុណ្ណោះ។
ជារួម ចាប់តាំងពីត្រីមាសទី ៤ ឆ្នាំ ២០២៤ មក ក្រុមហ៊ុន BYD គឺបានវ៉ាដាច់ក្រុមហ៊ុន Tesla អស់រយៈពេល ៤ ត្រីមាសជាប់ៗគ្នាហើយ ខណៈនៅក្នុងត្រីមាសចុងក្រោយនៃឆ្នាំ២០២៥ នេះ ក្រុមហ៊ុន BYD ផ្ទាល់ ក៏អាចនឹងបន្តវ៉ាដាច់ក្រុមហ៊ុន Tesla ទៀតផងដែរ៕
