[ទីផ្សារបរទេស] Rivian R1T គឺជារថយន្តភីកអាប់អគ្គិសនីដ៏ពិសេសមួយ ដោយវាមានបំពាក់បច្ចេកវិទ្យាទំនើបៗជាច្រើន ហើយថែមទាំងមានសមត្ថភាពខ្លាំងខាងបើកបរផ្លូវពិបាក (Off-Road) ថែមទៀតផង។ ម្ចាស់រថយន្ត R1T មួយរូប នៅសហរដ្ឋអាមេរិក បានធ្វើតេស្តរថយន្តរបស់ខ្លួន ដើម្បីដឹងថាវាមានសមត្ថភាពលុយទឹកខ្លាំងកម្រិតណា ដោយគាត់បានប្រើរថយន្តនេះអូសទូកចូលទៅក្នុងទឹក។
ម្ចាស់រថយន្តដែលប្រើគណនី YouTube ឈ្មោះថា Rivvit បានបកស្រាយថា ៖ “នៅពេលដែលខ្ញុំដឹងថារថយន្ត R1T អាចលុយទឹកបានជម្រៅជាង ១ម៉ែត្រនោះ ខ្ញុំក៏ឆ្ងល់ថាតើខ្ញុំអាចអូសទូករបស់ខ្ញុំចូលក្នុងទឹកនៃបឹង Bear Lake បានឬយ៉ាងណា។” តាមរយៈវីដេអូដែលបានបង្ហាញ ឃើញថារថយន្ត R1T នេះអាចបើកលុយទឹកក្នុងជម្រៅបានដោយមិនមានបញ្ហាអ្វីឡើយ។ សូមទស្សនាវីដេអូខាងក្រោម ៖
តាមការរៀបរាប់ក្រោមវីដេអូបានឲ្យដឹងថា ដើម្បីអូសទូកចូលក្នុងទឹក ជាធម្មតាគេប្រើប្រាស់រថយន្តដែលមានកម្លាំងខ្លាំង ឬប្រើប្រាស់ត្រាក់ទ័រតែម្ដង។ ការរៀបរាប់បានបញ្ជាក់ដែរថាទូកប្រភេទ Malibu 23 LSV នេះគឺមានទម្ងន់ប្រមាណ ១៨០០គីឡូក្រាម ឯដែកសណ្ដោងមានទម្ងន់ប្រមាណ ៦៨០គីឡូក្រាម ហេតុនេះរថយន្ត R1T បានប្រើកម្លាំងយ៉ាងខ្លាំងដើម្បីសណ្ដោង៕
