រថយន្តអគ្គិសនី Nissan Leaf EV ត្រូវបានដាក់លក់លើទីផ្សារសហរដ្ឋអាមេរិក តម្លៃចាប់ពី ២៩ ៩៩០ ដុល្លារ ខណៈរថយន្តស្ព័រកម្លាំងខ្លាំង Nissan GT-R មានតម្លៃចាប់ពី ៩៩ ៩៩០ ដុល្លារ។
ផ្ទុយទៅវិញ រថយន្ត Nissan Leaf EV កំពុងដាក់លក់នៅក្នុងប្រទេសសិង្ហបុរី ក្នុងតម្លៃរហូតដល់ទៅ ១៦៧ ៣០០ ដុល្លារឯណោះ។
រថយន្តនៅក្នុងប្រទេសសិង្ហបុរីសុទ្ធតែមានតម្លៃថ្លៃ ដោយសារតែរថយន្តថ្មីត្រូវបង់ពន្ធយ៉ាងហោចណាស់ ១០០ ភាគរយនៃតម្លៃទីផ្សាររបស់វា។ មិនតែប៉ុណ្ណោះ លិខិតសិទ្ធិ COE នៃរថយន្ត Nissan Leaf នៅក្នុងប្រទេសសិង្ហបុរី មានតម្លៃរហូតដល់ទៅ ៣៦ ៩៦១ ដុល្លារឯណោះ។
លើសពីនេះទៅទៀត មុនពេលជនជាតិសិង្ហបុរីអាចទិញ និងប្រើរថយន្តបាន ពួកគេត្រូវដេញថ្លៃទិញលិខិត COE នេះជាមុនសិន។ បើយោងតាមគេហទំព័រ Citylab បានឲ្យដឹងថា ប្រជាជនសិង្ហបុរីប្រហែល ១៥ ភាគរយប៉ុណ្ណោះ ដែលមានរថយន្តផ្ទាល់ខ្លួនជិះ៕
