[ទីផ្សារបរទេស] ម្ចាស់រថយន្ត Tesla មួយរូបនៅទីក្រុងសៀងហៃ បានបង្ហាញការត្អូញត្អែរលើបណ្ដាញសង្គម Weibo ជុំវិញថ្លៃវិក័យបត្រសាកភ្លើងរថយន្ត ដែលមានរហូតដល់ប្រមាណ ៦០៨ ៥១៥ដុល្លារ។
អ្នកប្រើដែលមានឈ្មោះ @滤镜粉碎机 បានបង្ហោះប្រវត្តិនៃការសាកភ្លើងដែលបង្ហាញថាថ្ងៃដែលគិតលុយអស់រហូតដល់ ៦០ម៉ឺនដុល្លារនេះគឺពួកគេបានប្រើប្រាស់ការសាកភ្លើងដែលឥតគិតថ្លៃអស់ចំនួន ២២៨៥គីឡូម៉ែត្រ និងបានប្រើប្រាស់ថាមពលអស់ ១ ៩២៣ ៧២០kWh ក្នុងអត្រាភ្លើង ០,៣២ដុល្លារ ក្នុងមួយគីឡូវ៉ាត់ម៉ោង។
ប្រវត្តិនៃការសាកនេះបង្ហាញថាថាមពលភ្លើងដែលបានប្រើគឺគ្រប់គ្រាន់សម្រាប់សាករថយន្ត Tesla Model 3 ប្រភេទ Entry បានរហូតដល់ជាង ៣ម៉ឺនដង ដែលវាជារឿងមិនអាចកើតមានរួចនោះទេ។
យ៉ាងណាក្ដី ផ្នែកសេវាកម្មអតិថិជនរបស់ Tesla បានប្រាប់ថាស្ថានីយសាកភ្លើងដែលម្ចាស់រថយន្តខាងលើបានប្រើគឺមានបញ្ហាបច្ចេកទេស រួមជាមួយបញ្ហាបច្ចេកទេសដែលកើតមានលើប្រព័ន្ធ Back-End នៃរថយន្តមួយចំនួន ដែលក្រុមការងាររបស់ Tesla កំពុងស្វែងរកដំណោះស្រាយ៕
