រថយន្តស្ព័រជប៉ុន Acura NSX ស៊េរីឆ្នាំ ២០១៩ បានបង្ហាញខ្លួនជាផ្លូវការនៅសហរដ្ឋអាមេរិក ដោយបានផ្លាស់ប្តូរការរចនាមួយចំនួន ព្រមទាំងបន្ថែមបច្ចេកវិទ្យាកាន់តែទំនើប។
រថយន្ត Acura NSX ស៊េរីថ្មីឆ្នាំ ២០១៩ នេះ បានធ្វើការផ្លាស់ប្តូរប៉ាណាខាងមុខថ្មី ដែលមានពណ៌ដូចពណ៌នៃតួរថយន្តតែម្តង។ ជាមួយគ្នានេះផងដែរ ផ្នែកខាងមុខ និងចំហៀង រួមទាំងខាងក្រោយរបស់វា បានបំពាក់ទៅដោយ Carbon Fiber ដែលជួយឲ្យរថយន្តកាន់តែមានភាពស្រស់ស្អាត ទាក់ទាញ ព្រមទាំងមានទម្ងន់ស្រាលទៀតផង។
រថយន្តស្ព័រ Hybrid នេះ បានបំពាក់ម៉ាស៊ីនសាំងចំណុះ ៣,៥ លីត្រ DOHC Twin-turbo ទំហំ ៦ ស៊ីឡាំង ជាមួយនឹងម៉ូទ័រអគ្គិសនីចំនួន ២ (Twin Motor Unit) នៅផ្នែកខាងមុខ ដែលបង្កើតកម្លាំងបានសរុបចំនួន ៥៧៣ សេះ និងប្រើប្រអប់លេខអូតូ ៩ វគ្គ។
លើសពីនេះទៅទៀត ប្រព័ន្ធបើកបរប៉ុងពីរ SH-AWD , ប្រព័ន្ធបូម Active Magnetorheologial Dampers , ចង្កូតប្រើភ្លើង និង ប្រព័ន្ធទប់លំនឹងរថយន្ត សុទ្ធតែទទួលបានកំណែ Software ថ្មីទាំងអស់។
ចំណែកឯផ្នែកខាងក្នុងវិញ NSX បានបំពាក់កៅអីស្បែក (Black Milano Leather) និង Alcantara ដែលអាចបញ្ជាដោយប្រើភ្លើង មកស្តង់ដារតែម្តង។ មិនតែប៉ុណ្ណោះ តួខ្លួនរបស់រថយន្ត Acura NSX ត្រូវបានធ្វើឲ្យមានភាពរឹងមាំជាងមុន ២៦% នៅផ្នែកខាងមុខ និង ១៩% នៅផ្នែកខាងក្រោយ។
រថយន្ត Acura NSX ស៊េរីឆ្នាំ ២០១៩ នឹងមានតម្លៃចាប់ពី ១៥៧ ៥០០ ដុល្លារនៅលើទីផ្សារសហរដ្ឋអាមេរិក៕
