កន្លងមកមានការលេចជាហូរហែមកហើយអំពីផែនការនៃការឈានជើងចូលពិភពរថយន្តរបស់ក្រុមហ៊ុន Apple ជាមួយរថយន្តអគ្គិសនីបើកបរស្វ័យប្រវត្តិ ដែលគេរំពឹងថាអាចបង្ហាញវត្តមាននៅត្រឹមឆ្នាំ ២០២៤។
ត្បិតថាក្រុមហ៊ុនដែលមានតម្លៃជាងគេក្នុងលោកនេះអាចឈានជើងចូលឧស្សាហកម្មយានយន្តក៏ពិតមែន ប៉ុន្តែលោក Herbert Diess ប្រធានក្រុមហ៊ុន Volkswagen មិនបានភ័យខ្លាចនឹង Apple នោះឡើយ។
ពេលនិយាយជាមួយកាសែតអាល្លឺម៉ង់ Frankfurter Allgemeine Sonntagszeiting លោក Diess បាននិយាយថា ៖ “ឧស្សាហកម្មរថយន្តមិនដូចជាឧស្សាហកម្មបច្ចេកវិទ្យាធម្មតា ដែលអ្នកអាចត្របាក់យកក្នុងពេលខ្លីបាននោះទេ។ Apple នឹងមិនអាចធ្វើវាក្នុងពេលតែមួយយប់នោះទេ។”
លោក Diess បានបន្ថែមថាវាមិនមែនជាអ្វីដែលភ្ញាក់ផ្អើលនោះទេចំពោះដំណឹងដែលថា Apple កំពុងផលិតរថយន្ត ដោយសារក្រុមហ៊ុននេះមានបទពិសោធន៍យូរឆ្នាំមកហើយខាងផ្នែកថាមពលថ្ម, ផ្នែក Software និងឌីហ្សាញ ហើយថែមទាំងមានប្រាក់បម្រុងដ៏ច្រើនមហាសាលទៀតផង។ យ៉ាងណាក្ដីលោក Diess បានបញ្ជាក់ដូចនេះថា “យើងមិនខ្លាចនោះទេ”៕
