ក្រុមហ៊ុន Toyota Motor Corp បាននិយាយកាលពីថ្ងៃច័ន្ទថា ខ្លួននឹងចេញរថយន្តអគ្គិសនី (BEV) ចំនួន ១៥ម៉ូដែលទៀត នៅទូទាំងពិភពលោក នៅត្រឹមឆ្នាំ ២០២៥ ដោយពង្រីកនូវត្រកូលរថយន្តអគ្គិសនីរបស់ខ្លួន ដើម្បីសម្រេចបានទ័ពរថយន្តដែលមិនបំពុលបរិស្ថាន មុនឆ្នាំ ២០៥០។
Toyota បាននិយាយនៅក្នុងសេចក្តីថ្លែងការណ៍មួយថា ក្រុមហ៊ុននឹងបង្កើនចំនួនរថយន្តអគ្គិសនីរបស់ខ្លួនដល់ប្រមាណជា ៧០ ម៉ូដែល ពីចំនួន ៥៥ ដែលបានផ្តល់ឲ្យនាពេលបច្ចុប្បន្ន។
ក្រុមហ៊ុនផលិតរថយន្តជប៉ុនខាងលើ បាននិយាយថា រថយន្ត BEV ថ្មីត្រកូលToyota BZ ដែលត្រូវបានដាក់បង្ហាញនៅក្នុងពិព័រណ៍រថយន្ត 2021 Shanghai Auto Show កាលពីថ្ងៃច័ន្ទ គឺសម្រាប់ប្រទេសចិន សហរដ្ឋអាមេរិក និងអឺរ៉ុប។
គួរឲ្យដឹងដែរថា ក្រុមហ៊ុនផលិតរថយន្តនៅជុំវិញពិភពលោក កំពុងតែផ្លាស់ប្តូរទៅប្រើយានយន្តដើរដោយថាមពលអគ្គិសនី ខណៈពេលដែលបទបញ្ញត្តិនៃការបំភាយឧស្ម័នពុល កាន់តែតឹងរឹងជាងមុន និងការប្រកួតប្រជែងកាន់តែខ្លាំងឡើង ដើម្បីអភិវឌ្ឍយានយន្តដែលមិនបញ្ចេញផ្សែងពុល៕
