ថ្មីៗនេះក្រុមហ៊ុន Brabus បានបង្ហាញរថយន្តម៉ូដែលថ្មីរបស់ខ្លួន គឺ Ultimate E Shadow Edition ដោយផ្អែកលើរថយន្តអគ្គិសនី Smart ForTwo EQ Cabrio ហើយមានកម្លាំងកាន់តែខ្លាំង រូបរាងកាន់តែកាច និងការអាប់ដេតផ្សេងៗជាច្រើន។
វាប្រើម៉ូទ័រអគ្គិសនីមួយ ដែលបង្កើតកម្លាំងបានសរុប ៩១ សេះ ខ្លាំងជាង Smart ForTwo EQ Cabrio ធម្មតា ១០ សេះ។ ក្រុមហ៊ុន Brabus បានអះអាងថា វាអាចជាន់ស្ទុះពីកុងទ័រ ០ ដល់ ១០០ គីឡូម៉ែត្រក្នុងមួយម៉ោង ប្រើពេល ១០,៩ វិនាទី ហើយមានល្បឿនអតិបរមារហូតដល់ទៅ ១៣០ គីឡូម៉ែត្រក្នុងមួយម៉ោង។
រថយន្តអគ្គិសនីរាងតូចច្រឡឹងជិះបានតែ ២ នាក់នេះ នឹងត្រូវផលិតមានចំនួនកំណត់ត្រឹមតែ ២៨ គ្រឿងប៉ុណ្ណោះ ហើយក្នុងមួយគ្រឿងមានតម្លៃចាប់ពី ៧៣ ៨៧០ ដុល្លារនៅក្នុងប្រទេសអាល្លឺម៉ង់ ដោយបូករួមជាមួយថ្លៃពន្ធ។
មិនតែប៉ុណ្ណោះ អ្នកបើកបរអាចជម្រើសរើសប្រភេទបើកបរដល់ទៅ ៤ ខុសៗគ្នា ខណៈ Sport+ សម្រាប់ការប្រើប្រាស់កម្លាំងអតិបរមា។ ផ្ទុយទៅវិញ នៅពេលដែលអ្នកបើកបរមិនត្រូវការកម្លាំងខ្លាំង គឺអាចជ្រើសរើសយក Eco និងរីករាយជាមួយចម្ងាយបើកបររហូតដល់ទៅ ១២៥ គីឡូម៉ែត្ររាល់ពេលសាកភ្លើងពេញម្តង៕
