ក្រុមហ៊ុន Jeep តែងតែសម្លឹងមើលលើការធ្វើឲ្យរថយន្តរបស់ខ្លួនកាន់តែប្រសើរ ជាមួយនឹងគ្រឿង performance parts ដូចជា lift kits និង mirror kits ជាដើម។
ឥឡូវនេះ ក្រុមហ៊ុនផលិតរថយន្តអាមេរិកខាងលើ បានបន្ថែមជម្រើសកញ្ចក់មុខ Gorilla Glass ថ្មី សម្រាប់ម៉ូដែល Wrangler, Wrangler Unlimited និង Gladiator ផងដែរ។
ក្រុមហ៊ុន Jeep បានឲ្យដឹងថា “នៅលើផ្លូវលំ ឬនៅលើផ្លូវធ្វើដំណើររាល់ថ្ងៃ ការខូចខាតកញ្ចក់អាចកើតឡើងគ្រប់ទីកន្លែងគ្រប់ពេលវេលា។ កញ្ចក់ជំនួសដែលត្រូវបានសាកល្បង និងមានគុណភាព ប្រភេទ Gorilla Glass របស់យើង អាចផ្តល់ជូននូវការការពារបន្ថែមដល់ Jeep Wrangler និង Gladiator”។
ដោយប្រើបច្ចេកវិទ្យាដូចគ្នានៅលើស្មាតហ្វូន កញ្ចក់ Gorilla Glass ថ្មីនេះនឹងស៊ូបានល្អជាងមុន។ នេះបើតាមការបញ្ជាក់ពីក្រុមហ៊ុន Jeep។
គួរឲ្យដឹងថា Jeep នឹងផ្លាស់ប្តូរកញ្ចក់ Gorilla Glass ថ្មីសម្រាប់រថយន្ត Wrangler ឬ Gladiator ក្នុងតម្លៃ ៧៩៣ដុល្លារ, ៨២០ដុល្លារ មានអង់តែន, ៩២៧ដុល្លារ មានកាមេរ៉ាមុខ និងមុខងារកម្តៅ ឬ ៩៣២ដុល្លារ មានទាំងអង់តែន កាមេរ៉ាមុខ និង មុខងារកម្តៅ៕
