ក្រុមហ៊ុន Mercedes-Benz នឹងធ្វើការប្រមូលរថយន្ត SUV EQC អគ្គិសនីរបស់ខ្លួននៅជុំវិញពិភពលោកចំនួន ១៩ ២៥៣គ្រឿងត្រលប់មកវិញ ព្រោះអាចមានបញ្ហាទឹកចូលទៅកាន់ប្រព័ន្ធគ្រប់គ្រងចង្កូតអេឡិចត្រូនិចរបស់រថយន្ត(Power Steering Control Unit)។
ចំពោះបញ្ហានេះ Mercedes-Benz ពុំទាន់ដឹងឡើយថារថយន្តទាំងនេះត្រូវបានគ្រប់គ្រងដោយម្ចាស់រថយន្តណាខ្លះឡើយ ប៉ុន្តែដឹងថារថយន្តស្ថិតនៅក្នុងប្រទេសអាល្លឺម៉ង់មានចំនួន ៣ ០៧៣គ្រឿង។ ដោយរថយន្តទាំងនេះនឹងត្រូវហៅត្រឡប់មកវិញដើម្បីធ្វើការត្រួតពិនិត្យ និងជួសជុលថ្មី។
ជាមួយគ្នានេះដែរ នេះមិនមែនជាលើកដំបូងក្នុងការហៅរថយន្ត EQC ត្រឡប់មកវិញនោះឡើយ ដោយនៅខែវិច្ឆិកា ឆ្នាំ ២០២០ កន្លងទៅត្រូវបានហៅត្រឡប់មកវិញព្រោះបញ្ហាទាក់ទងនឹងខ្សែភ្លើងផងដែរ។
រថយន្ត Mercedes-Benz EQC ដំណើរការដោយអាគុយទំហំ ៨០គីឡូវ៉ាត់ម៉ោង និងម៉ូទ័រអគ្គិសនីចំនួនពីរ អាចផលិតកម្លាំងបាន ៤០២សេះ និងកម្លាំងរមួល ៧៦០ញ៉ូតុនម៉ែត្រ៕
