រថយន្ត Acura Integra បានបង្ហាញខ្លួនសារជាថ្មីម្តងទៀត បន្ទាប់ពីបាត់មុខអស់រយៈពេល ២០ឆ្នាំ ព្រោះក្រុមហ៊ុនបានឈប់ផលិតវាក្នុងឆ្នាំ២០០១។
ឥឡូវនេះ ក្រុមហ៊ុន Acura បានបង្ហាញចេញនូវគំរូរថយន្ត Integra ហើយមិនខុសពីគំរូរថយន្តផ្សេងទៀតពីក្រុមហ៊ុន Acura ឬ Honda ឡើយ វាជាប្រភេទ Pre-production ដែលមានន័យថា វាសឹងតែដូចរថយន្តសម្រាប់លក់ ១០០% ទៅហើយ។ យ៉ាងណាមិញ រថយន្ត Acura Integra នឹងចេញលក់នៅឆ្នាំ២០២២ ខាងមុខនេះតែម្តង។
រថយន្ត Acura Integra នឹងមានបំពាក់ម៉ាស៊ីនសាំងចំណុះ ១,៥លីត្រ turbocharged ទំហំ ៤ស៊ីឡាំង ប៉ុន្តែក្រុមហ៊ុនមិនទាន់បានបញ្ជាក់អំពីកម្លាំងរបស់វាឡើយ តែគេរំពឹងថា វានឹងមានកម្លាំងប្រហែល ២០០សេះ ដូចទៅនឹងម៉ូដែល Honda Civic Si ដែរ។ អ្វីដែលគេដឹងច្បាស់នោះគឺ វានឹងប្រើប្រអប់លេខដៃ ៦វគ្គ និងប៉ុងមួយវិលកង់មុខ។
យ៉ាងណាក៏ដោយ ក្រុមហ៊ុន Acura បាននិយាយថា រថយន្ត Integra ជំនាន់ចុងក្រោយនេះ នឹងមានតម្លៃប្រហែល ៣ម៉ឺនដុល្លារ ហើយនឹងត្រូវផលិតនៅរោងចក្រ Marysville Auto Plant ក្នុងរដ្ឋ Ohio ជាមួយនឹងម៉ូដែល Acura TLX៕
