Rolls-Royce បានបន្ថែមនូវប្រភេទ Black Badge នៅលើរថយន្ត SUV ប្រណីតរបស់ខ្លួន ដែលប្រភេទនេះធ្លាប់មាននៅលើម៉ូដែល Dawn, Wraith និង Ghost រួចមកហើយ។
Cullinan Black Badge មានរូបរាងខាងក្រៅស្រោបដោយពណ៌ខ្មៅភ្លឺរលោង និងមានរំលេចដោយខ្សែឆ្នូតពណ៌លឿង ហើយផ្នែកខាងក្នុងក៏មានប្រើប្រាស់ពណ៌ខ្មៅជាគោលនៃការឌីហ្សាញ និងមានរំលេចដោយពណ៌លឿងដូចខាងក្រៅដែរ។ នៅលើដំបូលខាងក្នុងនៃរថយន្តគឺមានបំពាក់នូវគ្រាប់ភ្លើងចំនួន ១ ៣៤៤ គ្រាប់ ប្រៀបដូចជាគ្រាប់ផ្កាយអ៊ីចឹង។
ក្រៅពីមានរូបរាងពិសេសហើយ Cullinan Black Badge ក៏មានម៉ាស៊ីន ៦,៧៥ លីត្រ ១២ ស៊ីឡាំង កម្លាំងខ្លាំងលើសប្រភេទធម្មតា ២៩ សេះ ពោលវាបង្កើតកម្លាំងបាន ៥៩២ សេះ។ រថយន្តអាចរត់ពី ០ ដល់ ៩៦ គ.ម/ម៉ ដោយប្រើពេល ៤,៩ វិនាទី និងល្បឿនលឿនបំផុត ២៥០ គ.ម/ម៉។
Rolls-Royce Cullinan Black Badge ស៊េរីឆ្នាំ ២០២០ នេះ មានលក់ជាផ្លូវការហើយនៅសហរដ្ឋអាមេរិក ដែលមានតម្លៃចាប់ផ្ដើមពី ៣៨២ ០០០ ដុល្លារ៕
