[ទីផ្សារចិន] ក្រុមហ៊ុនផលិតរថយន្ត BYD បានធ្វើការចេញលក់ជាផ្លូវការនូវរថយន្តអគ្គិសនី BYD Seagull ស៊េរីឆ្នាំ ២០២៥ ដែលមានតម្លៃលក់ចាប់ពី ៩ ៩០០ ដុល្លារ ដល់ ១២ ០០០ ដុល្លារ នៅក្នុងទីផ្សារប្រទេសចិន។
រថយន្តនេះ ត្រូវបានផលិតឡើងនៅលើគ្រោងឆ្អឹង BYD e-Platform 3.0 មានប្រវែងតួខ្លួនសរុប ៣ ៧៨០ ម.ម ទទឹង ១ ៧១៥ ម.ម កំពស់ ១ ៥៤០ ម.ម និងប្រវែងគម្លាតកង់មុខ-ក្រោយ ២ ៥០០ ម.ម ដំណើរការដោយម៉ូទ័រអគ្គិសនីចំនួន ១ ផលិតកម្លាំងបាន ៧៤ សេះ និងកម្លាំងរមួល ១៣៥ ញ៉តូនម៉ែត្រ ផ្គួបជាមួយអាគុយទំហំ ៣០ និង ៣៨ គីឡូវ៉ាត់ម៉ោង អាចបើកបរបានចម្ងាយពី ៣០៥ ទៅ ៤០៥ គីឡូម៉ែត្រ នៅពេលសាកថ្មពេញម្តង រួមជាមួយមុខងារសាកថ្មល្បឿនលឿន សាកឡើងពី ៣០ ទៅ ៨០ ភាគរយ ចំណាយពេល៣០ នាទីប៉ុណ្ណោះ។
សម្រាប់ការចនាផ្នែកខាងក្រៅ រថយន្តនេះ ទទួលបានប៉ាណាមុខបិទជិត ចង្កៀងមុខដ៏ស្លីមប្រភេទ LED ភ្ជាប់ដោយមុខងារបើក-បិទដោយស្វ័យប្រវត្តិ ថាសកង់ស្ព័ររចនាថ្មីទំហំ ១៥ ដល់ ១៦ អ៊ីញ និងចង្កៀងក្រោយប្រភេទ LED អូសកាត់ពីផ្នែកម្ខាងទៅផ្នែកម្ខាង ខណៈនៅផ្នែកខាងក្នុងវិញ ទទួលបានកុងទ័របង្ហាញព័ត៌មានឌីជីថលទំហំ ៧ អ៊ីញ និងអេក្រង់កំសាន្តទំហំ ១០,១ អ៊ីញ ក៏ដូចជាកន្លែងសាកថ្មឥតខ្សែ កៅអីម៉ាស្សាសម្រាប់អ្នកបើកបរ ប្រព័ន្ធសំឡេង ៤ ចំនុច និងប្រព័ន្ធជំនួយការបើកបរជាដើម។
