ជារឿងគួរឲ្យភ្ញាក់ផ្អើលបំផុតក្នុងកម្មវិធីដេញថ្លៃរថយន្ដមួយកាលពីថ្មីៗនេះ ដោយក្នុងនោះរថយន្ត Ford Mustang Dark Horse SC ស៊េរីថ្មី គ្រឿងទី១ បានបំពាក់នូវបច្ចេកវិទ្យាពិសេសៗមួយចំនួនរបស់ម៉ូឌែល GTD បានលក់ដាច់នៅក្នុងការដេញថ្លៃជាមួយតម្លៃរហូតដល់ ១.២៥លានដុល្លារ។ ជាមួយតម្លៃនេះប្រហែលជាខ្ពស់ជាងតម្លៃលក់រាយរបស់រថយន្ដរនេះហូតដល់ទៅ ១០ ដងឯណោះ នេះបើតាមការប៉ាន់ស្មាន។
រឿដែលមិននឹកស្មានដល់មួយទៀត បើយោងតាមចុះផ្សាយរបស់សារព័ត៌មាន Autoevolution បានបញ្ជាក់ថាទឹកប្រាក់ ១០០ ភាគរយដែលទទួលបានពីការដេញថ្លៃនេះ នឹងត្រូវប្រគល់ជូនទៅអង្គការសប្បុរសធម៌ផ្តោតលើការស្រាវជ្រាវជំងឺទឹកនោមផ្អែមប្រភេទទី ១ (Type 1 Diabetes) Breakthrough T1D ។
មុនពេលដាក់រថយន្ដនេះក្នុងការដេញថ្លៃជាផ្លួវការ នាយកប្រតិបត្តិជាន់ខ្ពស់ម្នាក់របស់ក្រុមហ៊ុន Ford បានកាន់មីក្រូហ្វូន ដើម្បីដុតរំជួលអារម្មណ៍ហ្វូងមនុស្សភ្លាមៗមុនពេលការដេញថ្លៃចាប់ផ្តើម ហើយបានទម្លាក់តម្រុយដ៏គួរឲ្យចាប់អារម្មណ៍មួយអំពីកម្លាំងម៉ាស៊ីនរបស់ម៉ូឌែល SC ជាអ្វីដែលក្រុមហ៊ុន Ford រហូតមកដល់ពេលនេះ នៅតែរក្សាការសម្ងាត់យ៉ាងជិតឈឹងនៅឡើយ។
លោក Matt Simpson នាយកប្រតិបត្តិផ្នែកកែច្នៃរថយន្ត (Customization) របស់ក្រុមហ៊ុន Ford បាននិយាយថា៖ «នៅក្រោមគ្របម៉ាស៊ីន យើងបានបំពាក់ជាមួយម៉ាស៊ីនចំណុះ ៥.២ លីត្រ Supercharged V8 ដែលអាចផលិតកម្លាំងបានលើសពី ៧០០ សេះ»។
យ៉ាងមិញរថយន្ដនេះបានបំពាក់ម៉ាសុីដូចទៅម៉ូឌែល GTD ប៉ុន្តែត្រូវរថយន្ដ Mustang Dark Horse SC ដាក់ដេញថ្លៃនេះបានដំឡើងសមត្ថភាព (Tune) ឲ្យខ្លាំងជាងនេ គឺអាចបញ្ចេញកម្លាំងបានរហូតដល់ ៨១៥ សេះ។ ចំណែកឯម៉ូឌែល Dark Horse ធម្មតាគឺប្រើម៉ាស៊ីន ៥.០ លីត្រ ប្រភេទ Naturally-aspirated (គ្មាន Supercharger) មានកម្លាំងត្រឹមតែ ៥០០ សេះប៉ុណ្ណោះ។
លក្ខណៈពិសេសរថយន្តនេះត្រូវបានបំពាក់នូវប្រព័ន្ធហ្វ្រាំង Brembo carbon ដែលយកចេញពីម៉ូឌែល GTD, ប្រព័ន្ធបូម MagneRide ជាមួយនឹងការកំណត់បច្ចេកទេសពិសេស, ថាសកង់កាបូនទំហំ ២០ អុីញ និងកាងខាងក្រោយជាប្រភេទកាបូនជួយបង្កើតកម្លាំងសង្កត់ (Downforce) បានរហូតដល់ ២៨០ គីឡូក្រាម នៅពេលបើកបរក្នុងល្បឿន ២៩០ គីឡូម៉ែត្រ/ម៉ោង។
ចំណែកផ្នែកខាងក្នុងវិញ វាគឺជាការរួមបញ្ចូលគ្នារវាងរថយន្តប្រណាំង និងបច្ចេកវិទ្យាដ៏ទំនើប ដោយមានបំពាក់កៅអី Recaro, ស្បែក Alcantara, គ្រឿងតុបតែងកាបូន និងសូម្បីតែចង្កូតបានបំពាក់ជាមួយ (Paddle shifters) ធ្វើពី titanium ផលិតដោយម៉ាស៊ីនបោះពុម្ព 3D យកចេញពីម៉ូឌែល GTD ផងដែរ។
លោក Simpson បានប្រាប់ហ្វូងមនុស្សនៅក្នុងការដេញថ្លៃថា៖ «រថយន្តនេះត្រូវបានបង្កើតឡើងដោយមានបេសកកម្មតែមួយគត់ គឺទៅដើម្បីយកឈ្នះរថយន្តស្ព័រលំដាប់កំពូលរបស់អឺរ៉ុប»។ ជាមួយនឹងទឹកប្រាក់ ១.២៥ លានដុល្លារ អ្នកឈ្នះការដេញថ្លៃរថយន្ត SC នេះ អាចទិញរថយន្តស្ព័រលំដាប់កំពូលៗទាំងនោះបានយ៉ាងច្រើនគ្រឿង ប៉ុន្ដែអ្វីដែលធ្វើឲ្យម្ចាស់រថយន្ដសប្បាយចិត្ត ក្រៅពីរថយន្ដ Mustang Dark Horse SC គ្រឿងទី១ ផលិតមកជាពិសេសហើយគឺទឹកប្រាក់ទាំងត្រូវបរិច្ចោគដល់អង្គការសប្បុរសធម៌ផ្តោតលើការស្រាវជ្រាវជំងឺទឹកនោមផ្អែមប្រភេទទី ១ (Type 1 Diabetes) នេះក៏ជារឿងរំភើបមួយសម្រាប់ម្ចាស់រថយន្ដផងដែរ៕
