[ទីផ្សារបរទេស] ក្នុងកម្មវិធី Pebble Beach Concours d’Elegance ដែលត្រៀមប្រព្រឹត្តិទៅនៅថ្ងៃទី២១ ខែសីហា ខាងមុខនេះ Aston Martin បានប្រកាសអំពីផែនការដាក់បង្ហាញរថយន្តថ្មីចំនួនពីរម៉ូដែលក្នុងកម្មវិធី។
Aston Martin មិនបាននិយាយលម្អិតអ្វីច្រើនទេអំពីរថយន្តថ្មី ប៉ុន្តែបានបង្ហើបថារថយន្ដដែលបង្ហាញចេញនឹងជារថយន្តដ៏ពិសេស ជាម៉ូដែលដែលផ្ដាច់មុខបំផុត ដើម្បីអបអរសាទរដល់ខួបទី១០ឆ្នាំនៃរថយន្តប្រភេទ Q by Aston Martin។ បន្ថែមពីនេះ មានរថយន្តថ្មីមួយទៀតដែលផ្ដោតសំខាន់លើសមត្ថភាពខ្លាំងផងដែរ។
នៅក្នុងកម្មវិធីដដែលនេះ Aston Martin ក៏នឹងចែករំលែកអំពីការអភិវឌ្ឍន៍នៃរថយន្តម៉ាស៊ីនកណ្ដាលម៉ូដែល Valhalla ផងដែរ ដោយរថយន្តនេះនឹងត្រូវបង្ហាញជាមួយគ្រឿងបរិក្ខារខាងក្នុងដែលទទួលបានការកែសម្រួលថ្មី។
ជាចុងក្រោយ នៅក្នុងកម្មវិធីនេះ Aston Martin ក៏នឹងមានការដាក់បង្ហាញរថយន្ត DBX707 ដោយភ្ញៀវកិត្តិយសដែលត្រូវបានអញ្ជើញនឹងអាចបើកបរសាកល្បងរថយន្តមហាកម្លាំងនេះ ជាមួយការបំពាក់ម៉ាស៊ីន Twin-Turbo ចំណុះ៤,០លីត្រ ៨ស៊ីឡាំង ដែលផលិតកម្លាំងបាន ៦៩៧សេះ៕
