ក្រោយពីចូលរោងចក្រផលិតបានពីរឆ្នាំ និងផលិតមិនបាន ៩០០ គ្រឿងផង Aston Martin ក៏បានសម្រេចចិត្តឈប់ផលិតរថយន្តម៉ូដែល DB5 ក្នុងឆ្នាំ ១៩៦៥។ ពេលនេះក្រុមហ៊ុនបានបន្តការផលិតរថយន្តនេះឡើងវិញ ជាស៊េរីពិសេសផលិតមានកំណត់ដែលឲ្យឈ្មោះថា DB5 Goldfinger Continuation។
រថយន្តពិសេសនេះផលិតឡើងដោយសហការជាមួយអ្នកផលិតខ្សែភាពយន្ត James Bond ដែលរថយន្តមួយគ្រឿងៗចំណាយពេលផលិតប្រមាណ ៤៥០០ ម៉ោង និងមានតម្លៃចាប់ពីប្រមាណ ៣,៣៧លានដុល្លារ មិនគិតបញ្ចូលថ្លៃពន្ធ។ រថយន្តនេះផលិតមានកំណត់ត្រឹម ២៥គ្រឿងប៉ុណ្ណោះ។
រថយន្តទាំង ២៥គ្រឿងគឺសុទ្ធតែប្រើប្រាស់ពណ៌ខាងក្រៅឈ្មោះ Silver Birch ដូចជារថយន្តដើមដំបូង ហើយវាមានបំពាក់ម៉ាស៊ីនចំណុះ ៤,០លីត្រ ៦ស៊ីឡាំង អាចផលិតកម្លាំងបាន ២៩០សេះ។ ម៉ាស៊ីនមានភ្ជាប់ជាមួយប្រអប់លេខដៃ ៦វគ្គ ដែលបញ្ចូលកម្លាំងដល់កង់ខាងក្រោយ៕
