ក្រុមហ៊ុន BMW ទើបតែបានប្រកាសចេញរថយន្ត 3 Series ស៊េរីឆ្នាំ២០២២ ប្រភេទពិសេសថ្មី ហៅថា Iconic Edition ដែលផលិតផ្អែកលើប្រភេទតួវែង 3 Series Gran Limousine។
រថយន្តម៉ូដែលពិសេសនេះនឹងត្រូវផលិតមានចំនួនកំណត់ សម្រាប់ទីផ្សារប្រទេសឥណ្ឌា ជាមួយនឹងជម្រើសម៉ាស៊ីនម៉ាស៊ូត និងម៉ាស៊ីនសាំង ហើយនឹងត្រូវផលិតក្នុងស្រុកថែមទៀតផង។
គួរឲ្យដឹងថា រថយន្ត BMW 3 Series Gran Limousine ធម្មតា មានប្រវែង ៤,៨ម៉ែត្រ និងប្រវែងពីកង់មុខទៅកង់ក្រោយ ២,៩ម៉ែត្រ។
ចំពោះម៉ូដែលពិសេស Iconic Edition នេះ នឹងមានបំពាក់ប៉ាណាមុខ BMW Iconic Glow Kidney Grille ដែលនឹងអាចបញ្ចេញភ្លើងភ្លឺ ហើយមានបំពាក់ចង្កៀងមុខក្រោយ LED មកស្តង់ដារតែម្តង។
រថយន្ត BMW 3 Series Iconic Edition ត្រូវបានផលិតផ្អែកតាមម៉ូដែល 330Li និង 320Ld ដោយមានបំពាក់ម៉ាស៊ីនសាំងចំណុះ ២,០លីត្រ ទំហំ ៤ស៊ីឡាំង មានកម្លាំង ២៥៨សេះ និងកម្លាំងរមួល ៤០០ញ៉ូតុនម៉ែត្រ និងម៉ាស៊ីនម៉ាស៊ូតចំណុះ ២,០លីត្រ ទំហំ ៤ស៊ីឡាំង មានកម្លាំង ១៩០សេះ និងកម្លាំងរមួល ៤០០ញ៉ូតុនម៉ែត្រ។ ពួកវាប្រើប្រអប់លេខអូតូ ៨វគ្គ Steptronic Sport និងប៉ុងក្រោយ។
សូមបញ្ជាក់ថា រថយន្ត BMW 3 Series Gran Limousine Iconic Edition នឹងត្រូវដាក់លក់ក្នុងតម្លៃចាប់ពី ៧១ ៣៨០ដុល្លារ សម្រាប់ម៉ូដែល 330Li និង ៧៣ ២៥០ដុល្លារ សម្រាប់ម៉ូដែល 320Ld៕
