[ទីផ្សារបរទេស] ក្រុមហ៊ុនផលិតរថយន្ត BYD ប្រចាំនៅទីផ្សារប្រទេសអូស្រ្តាលី បានធ្វើការបញ្ជាក់ថា ក្រុមហ៊ុននឹងនាំយករថយន្តអគ្គីសនីសុទ្ធ BYD Atto2 មកកាន់ទីផ្សារប្រទេសនេះ នៅចុងឆ្នាំ ២០២៥ ដែលតម្លៃលក់ រំពឹងថា ចាបពីខ្ទង់ ២ម៉ឺនដុល្លារជាង ។
BYD Atto2 ត្រូវបានផលិតឡើងនៅលើគ្រោងឆ្អឹង e-platform 3.0 ដោយអាចប្រើប្រាស់ថាមពល និងកញ្ចប់អាគុយដូចម៉ូដែលលក់នៅចក្រភពអង់គ្លេស គឺម៉ូទ័រអគ្គិសនីចំនួន ១ អាចផលិតកម្លាំងបាន ១៧៦ សេះ និងកម្លាំងរមួល ២៩០ ញ៉ូតុនម៉ែត្រ ផ្គួបជាមួយអាគុយទំហំ ៤៥,១ គីឡូវ៉ាត់ម៉ោង អាចបើកបរបានចម្ងាយ ៣១២ គីឡូម៉ែត្រ នៅពេលសាកថ្មពេញម្តង ដោយការសាកថ្មនៅស្ថានីយ៍ល្បឿនលឿន បានពី ៣០-៨០% ប្រើរយៈពេល ២៨នាទី ។
រថយន្តប្រភេទ compact-SUV នេះ គឺស្ថិតនៅចន្លោះម៉ូដែល Dolphin និង Atto3 មានប្រវែងតួខ្លួនសរុប ៤ ៣១០ ម.ម ទទឹង ១ ៨៣០ ម.ម កម្ពស់ ១ ៦៧៥ ម.ម និងប្រវែងគម្លាតកង់មុខ-ក្រោយ ២ ៦២០ ម.ម។ សម្រាប់ការឌីស្សាញផ្នែកខាងក្រៅ មានការរចនាជាលក្ខណៈជាជ្រុង ដោយមានប៉ាណាមុខបិទជិត ចង្កៀងមុខ LED ឌីស្សាញថ្មី ក៏ដូចជាថាសកង់ស្ព័រទំហំ ១៧អ៉ីញ និងចង្កៀងក្រោយ LED អូសកាត់ពីផ្នែកម្ខាងទៅផ្នែកម្ខាង។
ចំពោះនៅផ្នែកខាងក្នុងវិញ ទទួលបានការរចនាជាមួយពណ៌ខ្មៅ និងពណ៌ត្នោតខ្ចីបញ្ជូលគ្នា កុងទ័របង្ហាញព័ត៌មានឌីជីថលទំហំ ៨,៨ អ៊ីញ និងអេក្រង់កំសាន្ត touchscreen ទំហំ ១២,៨ អ៊ីញ អាចប្រើមុខងារ Apple CarPlay និង Android Auto ក៏ដូចជាកន្លែងសាកថ្មឥតប្រើខ្សែ, ដំបូលកញ្ចក់ Panoramic sunroof និងប្រព័ន្ធ ADAS ផ្សេងៗជាដើម៕
