[ទីផ្សារបរទេស] ក្រុមហ៊ុនផលិតរថយន្ត Ford បានធ្វើការដាក់បញ្ចេញរថយន្ត Ford Mustang Mach-E នៅសហរដ្ឋអាមេរិកនៅចុងខែធ្នូ ឆ្នាំ ២០២០ ហើយបានក្លាយជារថយន្តប្រភេទ SUV អគ្គិសនីដ៏ពេញនិយមតាមរយៈ Mustang DNA និងបច្ចុប្បន្នគឺជារថយន្តអគ្គិសនីដែលលក់ដាច់បំផុតទី ២ នៅក្នុងទីផ្សារសហរដ្ឋអាមេរិក។
នៅដើមខែមីនា ក្រុមហ៊ុន Ford បានឈប់ទទួលការបញ្ជាទិញរថយន្ត Mustang Mach-E ដ៏ពេញនិយមចំនួនពីរគឺ Premium និង California Route 1 ដោយក្រុមហ៊ុន Ford បានបញ្ជាក់ទៅកាន់គេហទំព័រ Green Car Reports ថា វាគ្រាន់តែជាបញ្ហានៃការផ្គត់ផ្គង់ និងតម្រូវការដែលខ្វះខាតប៉ុណ្ណោះ។ បណ្តាលឱ្យមានតម្រូវការផ្អាកការកក់ទុកជាបណ្តោះអាសន្ន ដោយសារតម្រូវការលើសពីការរំពឹងទុក។
ទន្ទឹមនឹងនេះ អ្នកនាំពាក្យក្រុមហ៊ុន Ford លោក Emma Bergg បាននិយាយថា៖ ជាមួយនឹងតម្រូវការមិនធ្លាប់មានពីមុនសម្រាប់ម៉ូដែលទាំងនេះ យើងកំពុងពន្លឿនការផលិតរថយន្តដែលបញ្ជាទិញចាស់សម្រាប់ម៉ូដែល Premium និង California Route 1។ ខណៈបច្ចុប្បន្នការបញ្ជាទិញថ្មី ត្រូវរងចាំរហូតដល់ ២០ សប្តាហ៍នៅលើម៉ូដែល Select និងលើសពី ២៨ សប្តាហ៍នៅលើ GT អតិថិជននឹងត្រូវរងចាំរហូតដល់ឆ្នាំ ២០២៣។
គួរឲ្យដឹងថា ទាំងអស់នេះ បានបង្ហាញពីភាពពេញនិយមរបស់រថយន្ត Mustang Mach-E ហើយ Ford គ្រោងនឹងបង្កើនសមត្ថភាពផលិត Mach-E របស់ខ្លួនបីដងនៅក្នុងរោងចក្រ Cuautitlan ប្រទេសម៉ិកស៊ិកកូ និងមានគោលបំណងបង្កើនផលិតកម្មដល់ជាង ២០០,០០០ គ្រឿងក្នុងមួយឆ្នាំនៅអាមេរិកខាងជើង និងអឺរ៉ុបនៅឆ្នាំ ២០២៣។
ជាមួយគ្នានេះ ក្រុមហ៊ុន Ford ត្រូវបានគេរាយការណ៍ថាបានជ្រើសរើសបន្ថយការផលិតរថយន្ត Explorer និង Aviator SUV ជំនាន់ក្រោយ ដើម្បីបើកផ្លូវឲ្យរថយន្ត Mustang Mach-E ផលិតបានលឿនជាងមុន៕
