[បរទេស] បន្ទាប់ពីការបង្ហាញខ្លួនជាលើកដំបូងជាមួយមុខមាត់ថ្មីនៅក្នុងប្រទេសជប៉ុន ខណៈពេលេនះ ក្រុមហ៊ុន Honda បានធ្វើការអាប់ដេតសម្រាប់រថយន្ត Honda Jazz e:HEV ស៊េរីឆ្នាំ ២០២៣ របស់អឹរ៉ុប ដែលរួមមានការផ្លាស់ប្តូរការរចនាផ្នែកខាងក្រៅ, ម៉ាស៊ីនកូនកាត់ hybrid ដែលមានកម្លាំងខ្លាំងជាងមុន។
Honda Jazz e:HEV Advance Sport ថ្មីមើលទៅដូចគ្នាបេះបិទទៅនឹង Honda Fit e:HEV RS របស់ប្រទេសជប៉ុន ។ ការផ្លាស់ប្តូរលើរថយន្ត Honda Jazz ម៉ូដែលធម្មតាគឺផ្តោតទៅលើកាងខាងមុខដែលបានរចនាឡើងវិញជាមួយនឹងផ្ទៃពណ៌ខ្មៅដ៏ធំជុំវិញកន្លែងរន្ធបឹតខ្យល់ធំជាងមុន ប៉ាណាមុខរាងជាសំបុកឃ្មុំ Honeycomb កាងចំហៀង និងថាសកង់យស្ព័រទំហំ ១៦ អ៊ីញប្រភេទ 5-double spoke ជាមួយពណ៌តួខ្លួន Urban Grey នឹងកញ្ចក់ខ្មៅរលោង។
ខណៈម៉ូដែល Honda Jazz e:HEV Crosstar មានរូបរាងរឹងមាំជាងមុនដោយសារការកែលម្អនៅប៉ាណាមុខប្រភេទ Honeycomb grill និងការបន្ថែមពណ៌ប្រាក់នៅផ្នែកខាងក្រោមនៃតួខ្លួន ហើយទទួលបានពណ៌ខៀវថ្មីសម្រាប់ផ្នែកខាងក្រៅ និងពណ៌ថ្មីសម្រាប់ថាសកង់ផងដែរ។
ការអាប់ដេតផ្នែកខាងក្នុងត្រូវបានកំណត់ចំពោះជម្រើសពណ៌ និងកៅអីថ្មីសម្រាប់ Crosstar ។ Advance Sport ទទួលបានគ្រឿងស្បែកពណ៌ខ្មៅ/ប្រផេះ និងថ្នេដេរជាច្រើនពណ៌ ដៃចង្កូតបែបស្ព័រប្រភេទ 3-spoke steering wheel, កុងទ័របង្ហាញព័ត៌មានឌីជីថលទំហំ ៧ អ៊ីញ និងអេក្រង់គមសាន្តទំហំ ៩ អ៊ីញ និងកៅអី Magic Seats ខាងក្រោយផងដែរ។ លើសពីនេះ ប្រព័ន្ធ Honda Sensing ADAS ទទួលបានការអាប់ដេតថ្មី និងមានស្តង់ដារជាមួយនឹងពោងសុវត្ថិភាពចំនួន ១០ ចំនុច។
ចំពោះផ្នែកម៉ាស៊ីនវិញ Honda Jazz របស់អឺរ៉ុបគឺអាចប្រើបានទាំងស្រុងជាកូនកាត់ hybrid នៅអឺរ៉ុប និងចក្រភពអង់គ្លេស ដែលអផលិតកម្លាំងរួមបញ្ចូលគ្នាបាន ១២១ សេះ និងកម្លាំងរមួល ២៥៣ ញ៉ូតុនម៉ែត្រ ។ ខណៈម៉ូទ័រអគ្គិសនីទី ២ ដំណើរជាមួយម៉ាស៊ីនសាំងចំណុះ ១,៥ លីត្រ អាចផលិតកម្លាំងបាន ១០៦ សេះ និងកម្លាំងរមួល ១៣១ ញ៉ូតុនម៉ែត្រ។Honda ក៏បានកែប្រែប្រអប់លេខស្វ័យប្រវត្តិសម្រាប់ដំណើរការរលូន ។ សំខាន់ជាងនេះទៅទៀត Honda Jazz e:HEV Advance Sport ទទួលបានអត្ថប្រយោជន៍ពីការធ្វើឱ្យប្រសើរឡើងនៅប្រព័ន្ធ suspension ផងដែរ ។
ការលក់ស៊េរី Honda Jazz ដែលបានអាប់ដេតនៅអឺរ៉ុប និងចក្រភពអង់គ្លេសនឹងចាប់ផ្តើមនៅដើមឆ្នាំ ២០២៣។ ខណៈតម្លៃនឹងត្រូវបានប្រកាសនៅពេលរថយន្តនេះកាន់តែខិតជិតដល់ការចេញលក់នៅលើទីផ្សារ៕
