ឧស្សាហកម្មរថយន្តនៅសហរដ្ឋអាមេរិកចាប់ផ្ដើមមានភាពល្អប្រសើរឡើងវិញ ដូចជាក្រុមហ៊ុន Mazda ចំនួនលក់ប្រចាំខែកក្កដា ឆ្នាំ ២០២០ មានការកើនឡើងបើធៀបនឹងឆ្នាំ ២០១៩ ហើយ Hyundai ក៏មានសន្ទុះងើបឡើងវិញដោយសាររថយន្ត Palisade របស់ខ្លួនផងដែរ។
ពេលនេះ Kia បានបញ្ចេញតួលេខចំនួនលក់រាយប្រចាំខែកក្កដា ឆ្នាំ ២០២០ នៅក្នុងសហរដ្ឋអាមេរិក ដែលតួលេខធ្វើឲ្យគេភ្ញាក់ផ្អើលបំផុត។ ទោះបីជាជំងឺកូវីដ១៩បន្តរាតត្បាតមែន ប៉ុន្តែ Kia អាចលក់រថយន្តបាន ៥២ ៤៧៩គ្រឿង កាលពីខែកក្កដា ដែលជាប្រវត្តិសាស្ត្រថ្មីមួយប្រចាំខែកក្កដា មិនធ្លាប់ជួបពីមុនមក។
រថយន្តដែលលក់ដាច់ខ្លាំងជាងគេរបស់ Kia គឺម៉ូដែល Sorento និង Sportage ដែលសុទ្ធសឹងជារថយន្ត SUV។ ចំណែករថយន្ត Telluride ក៏មានតម្រូវការខ្ពស់ផងដែរ ដែលចំនួនលក់មានការកើនឡើង ៦៨,៣% ធៀបនឹងខែមុន។
រថយន្តដែលលក់បានតិចបំផុតរបស់ Kia គឺម៉ូដែល K900 ដែលលក់បានត្រឹម ២៥គ្រឿង តាមពីក្រោយដោយរថយន្ត Cadenza ដែលលក់បាន ១០០គ្រឿង៕
