[ទីផ្សារបរទេស] ក្រុមហ៊ុន Kia បានប្រកាសចេញតម្លៃលក់សម្រាប់រថយន្ត Sorento ស៊េរីឆ្នាំ២០២៣ ប្រភេទ PHEV ដោយវានឹងមានតម្លៃខ្ពស់ជាងមុន ពេលចេញលក់លើទីផ្សារសហរដ្ឋអាមេរិក។
រថយន្តស៊េរីថ្មីនេះ បានលុបបំបាត់ចោលនូវប្រភេទ SX ដោយមានតែប្រភេទ SX-P មួយតែប៉ុណ្ណោះ ជាមួយតម្លៃចាប់ផ្ដើមពី ៥១ ១៨៥ដុល្លារ។ ងាកទៅមើលប្រភេទ SX-P កាលពីស៊េរីឆ្នាំ២០២២ គឺមានចាប់ពី ៤៩ ០៦៥ដុល្លារ មិនដល់ ៥ម៉ឺនដុល្លារឡើយ ខណៈដែលប្រភេទ SX ពីមុនមានតម្លៃចាប់ពី ៤៦ ១៦៥ដុល្លារ។
Kia Sorento PHEV SX-P ស៊េរីឆ្នាំ២០២៣ មានមកជាមួយមុខងារពិសេសៗមួយចំនួនដូចជាមានវាំងននការពារកម្ដៅថ្ងៃសម្រាប់កញ្ចក់ខាងក្រោយ, មុខងារសុវត្ថិភាពដូចជាបច្ចេកវិទ្យាទប់ស្កាត់ការប៉ះទង្គិច, មុខងារជំនួយដល់ការរក្សាគន្លងផ្លូវ, មុខងារឲ្យដំណឹងអ្នកបើកបរឲ្យផ្ដោតអារម្មណ៍លើការបើកបរ, មុខងារទប់ស្កាត់ការប៉ះទង្គិចពីខាងមុខ និងមានអេក្រង់ដែលអាចមើលទិដ្ឋភាពជុំវិញជាដើម។
រថយន្តនេះដែរ ក៏មាននូវកៅអីអង្គុយខាងមុខដែលអាចបញ្ចេញកម្ដៅបាន, មានគូថរថយន្តបើកតាមបែបអេឡិចត្រូនិក, មានប្រព័ន្ធសំឡេង Bose ចំនួន១២គ្រាប់, មានដំបូលកញ្ចក់វែង និងមានអេក្រង់កម្សាន្តទំហំ ១០,២៥អ៊ីញ។
ចំពោះម៉ាស៊ីនវិញ វាប្រើម៉ាស៊ីន Turbocharged ចំណុះ១,៦លីត្រ ៤ស៊ីឡាំង ដែលអាចផលិតកម្លាំងសរុបបាន ២៦១សេះ និងប្រើប្រអប់លេខស្វ័យប្រវត្តិ៦វគ្គ។ ប្រព័ន្ធកម្លាំងអគ្គិសនីលើរថយន្តនេះ អាចឲ្យវាបើកបរដោយប្រើថាមពលអគ្គិសនីសុទ្ធបានចម្ងាយ ៥១,៥គីឡូម៉ែត្រ និងប្រើពេល ៣,៥ម៉ោង ដើម្បីសាកភ្លើងពេញ៕
