ម៉ាករថយន្តណាមានអតិថិជនស្ម័គ្រស្មោះជាងគេ?

July 20, 2019

ជារៀងរាល់ឆ្នាំ JD Power ដែលធ្វើការស្ទង់មតិលើម៉ាករថយន្តនៅសហរដ្ឋអាមេរិក ដើម្បីកំណត់ថាអតិថិជននៃម៉ាករថយន្តណាមួយស្ម័គ្រស្មោះជាងគេ មានន័យថាពេលប្ដូររថយន្តថ្មីនៅតែទិញរថយន្តម៉ាកដដែល។

ឆ្នាំទៅ Toyota ឈរនៅតំណែងកំពូលសម្រាប់ប្រភេទរថយន្តធម្មតា ហើយម៉ាក Lexus ឈរនៅតំណែងកំពូលសម្រាប់ប្រភេទរថយន្តប្រណីត។ យ៉ាងណាក្ដីតំណែងឆ្នាំនេះមានការផ្លាស់ប្ដូរបន្តិចបន្តួច។

ចំណាត់ថ្នាក់ប្រចាំឆ្នាំរបស់ JD Power បានបង្ហាញថាម៉ាករថយន្ត Subaru ឈរនៅតំណែងកំពូល ដោយមានអតិថិជន ៦១,៥% ទិញរថយន្តម៉ាកនេះប្រើលើកទីពីរ។ លេខពីរគឺ Toyota ដែលមាន ៥៩,៥% តាមពីក្រោយដោយ Honda, RAM, Ford, Kia, Chevrolet, Nissan, Hyundai, Jeep, Volkswagen, Mazda, GMC, Mitsubishi, Buick, Dodge, Fiat, Chrysler និង Smart។

និយាយពីម៉ាករថយន្តប្រណីតវិញ Lexus បន្តកាន់កាប់តំណែងលើគេ ជាមួយអតិថិជនស្មោះស្ម័គ្រចំនួន ៤៧,៦%។ Lexus តាមពីក្រោយដោយ Mercedes-Benz, BMW, Porsche, Audi, Land Rover, Maserati, Acura, Lincoln, Cadillac, Volvo, Infiniti និង Jaguar។ កាលពីឆ្នាំទៅតំណែងកំពូលទាំង ៣ បានទៅលើ Lexus, Audi និង Land Rover៕

ផ្ទាំងផ្សាយពាណិជ្ជកម្ម

ចង់ទិញ Bugatti Chiron ត្រូវកក់លុយ ២៥ ម៉ឺនដុល្លារមុន

July 20, 2019

Bugatti Chiron ជារថយន្តកម្រមួយមានផលិតត្រឹមតែ ៥០០ គ្រឿងក្នុងលោក ហើយបច្ចុប្បន្ននេះនៅសល់ប្រមាណ ១០០ គ្រឿងប៉ុណ្ណោះ មិនទាន់ផលិតឡើង និងមិនទាន់ស្វែងរកម្ចាស់ឃើញនៅឡើយ។ ដំណើរការទិញរថយន្តតម្លៃខ្ទង់ជាង ២ លានដុល្លារនេះដែរ គឺមិនមែនសាមញ្ញដូចការទិញរថយន្តធម្មតា មានលុយអាចទិញយកមកជិះបានភ្លាមនោះទេ។

ខាងក្រោមនេះជាដំណាក់កាលដែលត្រូវឆ្លងកាត់ចំពោះការទិញរថយន្ត Bugatti Chiron ៖

ត្រូវទៅកាន់ហាងលក់រថយន្ត Bugatti Chiron ដែលមានក្នុងតំបន់
ពេលចូលដល់ក្នុងហាងត្រូវជ្រើសរើសការរចនាដែលអ្នកពេញចិត្ត ដូចជារើសពណ៌ខាងក្នុង និង ខាងក្រៅជាដើម

ពេលជ្រើសរើសរួចហើយអតិថិជននឹងទទួលបានការអញ្ជើញទៅទស្សនានៅរោងចក្រផលិតរថយន្ត Bugatti Chiron ដោយដៃ ដែលមានទីតាំងនៅប្រទេសបារាំង
បន្ទាប់ទៀតត្រូវឆ្លងកាត់ការបើកបរសាកល្បង ដែលមានអ្នកបើកបរជំនាញចាំបង្ហាញ
បន្ទាប់មកទៀតអតិថិជនរបស់ Bugatti Chiron ត្រូវធ្វើការកក់ប្រាក់ ២០ ម៉ឺនផោន ដែលស្មើប្រមាណ ២៥ ម៉ឺនដុល្លារ ជាមុនសិន

ត្រូវរង់ចាំ ៦ ទៅ ៩ ខែទើបរថយន្ត Bugatti Chiron ដែលអតិថិជនជ្រើសរើស ផលិតរួចរាល់
ពេលរួចរាល់ហើយអតិថិជនអាចសម្រេចចិត្តថាទៅទទួលយករថយន្តផ្ទាល់នៅហាងលក់ ឬ អាចឲ្យក្រុមហ៊ុនដឹករថយន្តទៅដល់ផ្ទះ និង ធ្វើការបង់ប្រាក់ផ្ដាច់តែម្ដង៕

ផ្ទាំងផ្សាយពាណិជ្ជកម្ម

ញាក់សាច់ហ្មង! គ្រាន់តែទឹកថ្នាំពណ៌បៃតង លើរថយន្ត Porsche 911 នេះ ចង់ថ្លៃស្មើឡាន

July 19, 2019

រថយន្ត Porsche 911 Turbo S ធម្មតា មានតម្លៃខ្ទង់ ១៥០ ០០០ដុល្លារ។ ផ្ទុយទៅវិញ រថយន្ត Porsche 911 Turbo S ពណ៌បៃតង (Phyton Green Chromaflair) នេះវិញ មានតម្លៃរហូតដល់ទៅជិត ២៥០ ០០០ដុល្លារ ព្រោះគ្រាន់តែទឹកថ្នាំរបស់វាមានតម្លៃជាង ៩៧ ០០ដុល្លារទៅហើយ។

រថយន្ត Porsche 911 Turbo S ដែលមានពណ៌បៃតងដ៏រលើបរលោង និងស្រស់ស្អាតនេះ ត្រូវបានគេដាក់បង្ហាញនៅឯកម្មវិធី AvD Oldtimer Grand Prix នៅទីលានប្រណាំងរថយន្ត Nurburgring ក្នុងទីក្រុង Nurbur ប្រទេសអាល្លឺម៉ង់ កាលពីសប្តាហ៍មុន។

ពណ៌ថ្នាំដែលមានតម្លៃថ្លៃស្មើរថយន្ត Porsche 911 Carrera មួយគ្រឿងនេះ គឺជាគំរូមួយក្នុងចំណោមគំរូចំនួន៥ ដែលត្រូវបានផលិតជារៀងរាល់ឆ្នាំ ហើយអ្វីដែលធ្វើឲ្យវាមានតម្លៃថ្លៃបែបនេះ ក៏ដោយសារតែវាមានចំណាំងពន្លឺពណ៌ខុសគ្នាជាច្រើន ដូចជា ខៀវ មាស និង ស្វាយ ផងដែរ៕

ផ្ទាំងផ្សាយពាណិជ្ជកម្ម

Lamborghini Urus Hybrid នឹងមានកម្លាំងខ្លាំងជាង Urus ធម្មតាទៅទៀត!

July 19, 2019

បច្ចុប្បន្ននេះ Lamborghini Urus កំពុងកាន់កាប់តំណែង “រថយន្ត SUV លឿនបំផុតនៅលើពិភពលោក”។ វាប្រើម៉ាស៊ីនសាំងចំណុះ ៤,០ លីត្រ Twin-turbo ទំហំ ៨ ស៊ីឡាំង មាន ៦៤១ សេះ ហើយមានល្បឿនអតិបរមា ៣០៥ គីឡូម៉ែត្រក្នុងមួយម៉ោង។

នាពេលថ្មីៗកន្លងទៅនេះ លោក Maurizio Reggiani ប្រធានផ្នែកបច្ចេកវិទ្យារបស់ក្រុមហ៊ុន Lamborghini បានប្រាប់គេហទំព័ររថយន្ត Drive ថា ក្រុមហ៊ុនកំពុងមានគម្រោងផលិត Urus Hybrid ដែលមានកម្លាំងខ្លាំងជាងនេះទៅទៀត។ វាមានបច្ចេកវិទ្យាស្រដៀង Porsche Cayenne Turbo S E-Hybrid ប៉ុន្តែបន្ថែមកម្លាំងកាន់តែខ្លាំង ដើម្បីជួយឲ្យវារក្សាតំណែង “រថយន្ត SUV លឿនបំផុត” ។

តាមរយៈការអះអាងខាងលើ គេអាចរំពឹងថា Lamborghini Urus Hybrid នឹងមានកម្លាំងលើសពី ៦៨០ សេះ ស្របពេលដែលលោក Reggiani បញ្ជាក់បន្ថែមថា វាអាចនឹងបង្ហាញខ្លួនក្នុងពេលឆាប់ៗខាងមុខ៕

ផ្ទាំងផ្សាយពាណិជ្ជកម្ម

ឡានភីកអាប់អគ្គិសនីតម្លៃជិត ២ ម៉ឺនដុល្លារ ជិះបាន ៤០៣ គីឡូម៉ែត្រ

July 19, 2019

គ្រប់គ្នាកំពុងចាប់អារម្មណ៍ខ្លាំងលើរថយន្តភីកអាប់អគ្គិសនី ក្រោយក្រុមហ៊ុនមួយចំនួនដូចជា Rivian បានបង្ហាញចេញរថយន្តប្រភេទនេះជាសាធារណៈ។ នៅប្រទេសចិនឯណោះវិញក៏មានក្រុមហ៊ុនបានចាប់ផ្ដើមផលិតរថយន្តភីកអាប់អគ្គិសនីនេះដែរ ដោយសុទ្ធសឹងមានតម្លៃធូរ។

ចុងក្រោយបង្អស់នេះគឺជារថយន្តភីកអាប់របស់ក្រុមហ៊ុនរថយន្ត Dongfeng ម៉ូដែល Rich 6 EV ដែលផលិតឡើងផ្អែកតាមរថយន្ត Dong Rich 6 ប្រភេទម៉ាស៊ីនសាំង។ Rich 6 EV ប្រើប្រាស់ម៉ូទ័រអគ្គិសនីចំនួនមួយ ដែលមានកម្លាំង ១៦០ សេះ អាគុយមានថាមពល ៦៨ គីឡូវ៉ាត់ម៉ោង។

រថយន្តនេះអាចបើកបរនៅល្បឿនអតិបរមា ១១០ គ.ម/ម៉ និងបើកបរបានចម្ងាយ ៤០៣ គីឡូម៉ែត្រ ពេលសាកពេញ ហើយចំណាយពេលត្រឹមតែ ៤៥ នាទី អាចសាកថ្មបាន ៨០%។ Rich 6 EV ជាភីកអាប់ទំហំធំ មានវិមាត្រ ៥២៩០ x ១៨៥០ x ១៧៩០ ម.ម មានទម្ងន់ ១៩៨៣ គីឡូក្រាម និងមានកៅអីអង្គុយចំនួន ៥។

Rich 6 EV នឹងចេញលក់លើទីផ្សារចិននៅចុងខែនេះ ដោយរំពឹងថាមានតម្លៃប្រមាណ ១៣០ ០០០ យ័ន ឬ ស្មើប្រមាណ ១៨ ៩០០ ដុល្លារ៕

ផ្ទាំងផ្សាយពាណិជ្ជកម្ម

ឡាន Chevrolet Silverado ពិសេសកង់ ៦ ថ្លៃជាងប្រភេទធម្មតា ១៣ ដង

July 19, 2019

ក្រោយពីបានធ្វើការកែច្នៃរថយន្ត Ford Raptor ដាក់កង់ ៦ រួចមកហើយនោះ ពេលនេះក្រុមហ៊ុនជំនាញកែច្នៃរថយន្ត Hennessey Peroformance បានសម្រេចចិត្តកែរថយន្ត Chevrolet Silverado ស៊េរីឆ្នាំ ២០២០ វិញម្ដង។

រថយន្តដែលទទួលបានការកែច្នៃពិសេសនេះ ត្រូវបានគេដាក់ឈ្មោះឲ្យថា Goliath 6×6។ វាមានបំពាក់នូវប្រព័ន្ធទំហំធំ, ថាសកង់ Hennessey ទំហំ ២០ អ៊ីញ និងសម្បកកង់ទំហំ ៣៧ អ៊ីញប្រភេទ Off-Road, មានប្រព័ន្ធភ្លើង LED បាញ់ភ្លើងបានខ្លាំង, តួខ្លួនវែងជាងមុន និង ថែមកាងមុខក្រោយពោរពេញដោយអំណាច។

រថយន្ត Goliath 6×6 នេះបំពាក់ម៉ាស៊ីន General Motor ចំណុះ ៦,២ លីត្រ មាន ៨ ស៊ីឡាំង ដែលជាការផ្លាស់ប្ដូរធំមួយបើធៀបនឹងម៉ាស៊ីនដើមមានចំណុះ ២,៩ លីត្រ ហើយវាអាចបង្កើតកម្លាំងបាន ៧០៥ សេះ។

រថយន្តកែច្នៃពិសេសនេះ មានគម្រោងថាផលិតត្រឹម ២៤ គ្រឿងប៉ុណ្ណោះ ដោយមួយគ្រឿងៗមានតម្លៃ ៣៧៥ ០០០ ដុល្លារឯណោះ ថ្លៃជាងរថយន្ត Chevrolet Silveradoដែលលក់នៅអាមេរិកដល់ ១៣ ដង៕

ផ្ទាំងផ្សាយពាណិជ្ជកម្ម

មកស្គាល់ រថយន្តដំបូងគេបំផុតនៅលើពិភពលោក

July 19, 2019

រថយន្ត Benz Patent-Motorwagen គឹជារថយន្តដំបូងរបស់ពិភពលោកដែលទទួលបានអាញ្ញាប័ណ្ណ និងផលិតនៅឆ្នាំ ១៨៨៥។ រថយន្តនោះត្រូវបានបង្កើតដោយលោក Karl Benz ជនជាតិអាឡឺម៉ង ដែលជាស្ថាបនិករថយន្តដំបូងគេបង្អស់។ ការផលិតនោះគឺចំនាយថវិការអស់ចំនួន ៦០០ imperial German marks ដែលមានតម្លៃប្រហែល ១៥០ ដុល្លារនៅសម័យនោះ បើធៀបមកតម្លៃលុយត្រឹមឆ្នាំ ២០១៨ ប្រហែល ៤,១៨៣ដុល្លារ។ រថយន្តដំបូងនោះត្រូវបានផលិតដោយប្រើប្រាស់ម៉ាសុីនសាំង ប្រើប្រាស់សុីឡាំងចំនួន ១ ទំហំ ៩៥៤ សេស។ អ្វីដែលអស្ចារ្យនោះ គឺមានកង់តែ ៣ប៉ុណ្ណោះ ដែលអាចបើកបរបានត្រឹមតែ ១៦គ.ម ក្នុងម៉ោង។

ផ្ទាំងផ្សាយពាណិជ្ជកម្ម

Hyundai Sonata ឆ្នាំ ២០២០ ក្នុង-ក្រៅរចនាថ្មីទាំងអស់ ស្អាតកប់ហ្មង!

July 18, 2019

កាលពីពេលថ្មីៗនេះ ក្រុមហ៊ុន Hyundai បានបញ្ចេញរថយន្ត Sedan ដ៏ពេញនិយមរបស់ខ្លួន គឺ ម៉ូដែល Sonata ស៊េរីឆ្នាំ ២០២០ ដែលទទួលបានការរចនាថ្មីសន្លាង ទាំងផ្នែកខាងក្រៅ និងខាងក្នុង។

Sonata ស៊េរីថ្មី ប្រើប្រាស់គំរូរចនា Sensuous Sportiness របស់ក្រុមហ៊ុន Hyundai ដំបូងបង្អស់ ដែលពាំនាំការរចនាពីគំរូរថយន្តម៉ូដែល Le Fil Rouge ដែលធ្លាប់បានបង្ហាញខ្លួននៅក្នុងកម្មវិធី Geneva Motor Show កាលពីឆ្នាំ ២០១៨។

រថយន្ត Sedan នេះ មានកម្ពស់ទាបជាងមុន ១,១ អ៊ីញ និង ទទឹងរីកធំជាងមុន ០,៩ អ៊ីញ ដែលមើលទៅពិតជាមានភាពស្ព័រ និងទាក់ទាញជាងម៉ូដែលមុនៗខ្លាំងតែម្តង។ មិនតែប៉ុណ្ណោះ វាក៏បានពង្រីកប្រវែងពីកង់មុខទៅកង់ក្រោយ ១,៣ អ៊ីញ និង មានប្រវែងសរុបវែងជាងមុន ១,៧ អ៊ីញផងដែរ។

រឹតតែពិសេស អំពូល Daytime Running Lights ផ្នែកខាងមុខរបស់ Sonata គឺជាប្រភេទ Hidden Lighting Lamps ដែលយកពីគំរូម៉ូដែល HDC-2 ទៀតផង។ បើនិយាយពីផ្នែកខាងក្នុងវិញ ត្រូវបានរចនា និងរៀបចំយ៉ាងប្រណីត ផ្តល់នូវផាសុកភាពខ្ពស់ចំពោះអ្នកប្រើប្រាស់។

Sonata ឆ្នាំ ២០២០ ប្រើម៉ាស៊ីនសាំងចំណុះ ២,៥ លីត្រ Naturally Aspirated ទំហំ ៤ ស៊ីឡាំង មានកម្លាំង ១៩១ សេះ សម្រាប់ម៉ូដែល SE និង SEL ។ ដោយឡែក ម៉ូដែល SEL Plus និង Limited វិញ ប្រើម៉ាស៊ីនសាំងចំណុះ ១,៦ លីត្រ Turbocharged ទំហំ ៤ ស៊ីឡាំង មានកម្លាំង ១៨០ សេះ ។ ពួកវាប្រើប្រអប់លេខអូតូ ៨ វគ្គ ហើយមានតម្លៃចន្លោះពី ២២ ៥០០ ដុល្លារ និង ៣២ ១០០ ដុល្លារ៕

ផ្ទាំងផ្សាយពាណិជ្ជកម្ម

ឡាន Lexus LX470 ឆ្នាំ២០០១ នេះ លក់ថ្លៃជាង LX570 ឆ្នាំ២០១៩ ទៀត ដោយសារហេតុផលពិសេស

July 18, 2019

បច្ចុប្បន្ននេះ រថយន្តចាស់ដែលមានចម្ងាយបើកបរតិច និងស្ថិតនៅក្នុងសភាពថ្មី ពិតជាកម្រមានណាស់។

ផ្ទុយទៅវិញ រថយន្ត Lexus ម៉ូដែល LX470 ស៊េរីឆ្នាំ ២០០១ មួយគ្រឿង ដែលម្ចាស់វាទើបប្រើបានចម្ងាយ ១ ០៤៣ ម៉ាយ (១៦៧៨ គីឡូម៉ែត្រ) ត្រូវបានដាក់លក់ក្នុងតម្លៃរហូតដល់ទៅ ១៣៩ ០០០ ដុល្លារឯណោះ ពោលគឺថ្លៃជាង Lexus LX570 ស៊េរីឆ្នាំ ២០១៩ ដែលមានតម្លៃត្រឹមតែខ្ទង់ ១០ ម៉ឺនដុល្លារប៉ុណ្ណោះនៅលើទីផ្សារបរទេស។

អ្នកលក់រថយន្ត SUV ខាងលើ បានរៀបរាប់ដំណើររឿង និងបង្ហាញពីមូលហេតុដែលវាត្រូវគេប្រើតិចបំផុតបែបនេះថា វាត្រូវបានគេលួចយកចេញពីកន្លែងលក់រថយន្ត Lexus មួយកន្លែង កាលពីឆ្នាំ ២០០១ មុនពេលរថយន្តត្រូវដឹកទៅឲ្យម្ចាស់។ មិនតែប៉ុណ្ណោះ ចោរបានទុករថយន្ត LX470 ខាងលើ នៅក្នុងឃ្លាំងមួយដែលមានរថយន្តប្រណីតជាង ២០ គ្រឿងផ្សេងទៀតផង។

អ្វីគ្រប់យ៉ាងនៅលើ Lexus LX470 នេះ មើលទៅស្រស់ស្អាត ខណៈប៊ូតុងប្លាស្ទិកនៅលើផ្ទៃតាប្លូមានសភាពថ្មីសន្លាងតែម្តង ហាក់បីដូចជាមិនទាន់បានប្រើពីមុនមកអីចឹង។

រថយន្ត Lexus LX470 ប្រើម៉ាស៊ីនសាំងចំណុះ ៤,៧ លីត្រ ទំហំ ៨ ស៊ីឡាំង មានកម្លាំង ២៣០ សេះ ដំណើរការដោយប្រអប់លេខអូតូ ៤ វគ្គ និងប្រព័ន្ធបើកបរប៉ុងពីរ៕

ផ្ទាំងផ្សាយពាណិជ្ជកម្ម

ឡាន MG ZS EV សាកថ្មមួយពេញជិះបាន ២៦០ គ.ម តម្លៃជាង ២ ម៉ឺនដុល្លារ

July 18, 2019

ការទទួលការកុម្ម៉ង់ទិញរថយន្តអគ្គិសនី MG ZS EV ត្រូវបានបើកទទួលនៅចក្រភពអង់គ្លេស ដោយអតិថិជនដំបូងចំនួន ១ ពាន់នាក់ អាចទិញរថយន្តនេះក្នុងតម្លៃចាប់ពីត្រឹម ២៦ ៧០០ ដុល្លារប៉ុណ្ណោះ ហើយទទួលបានឧបករណ៍សាកភ្លើងនៅផ្ទះ និងដំឡើងឥតគិតថ្លៃ។

រថយន្តអគ្គិសនីនេះប្រើប្រាស់ម៉ូទ័រអគ្គិសនីបំពាក់នៅផ្នែកខាងមុខ ដែលមានកម្លាំង ១០៥ គីឡូវ៉ាត់ (១៤១ សេះ) ដែលទទួលបានពីអាគុយប្រភេទលីចូមទំហំ ៤៤,៥ គីឡូវ៉ាត់ម៉ោង ហើយអាចបើកបរបានចម្ងាយ ២៦២ គីឡូម៉ែត្រពេលសាកចេញ។

ZS EV គឺជារថយន្តទំនើបជាងគេបំផុតរបស់ MG មានដូចជា Advanced Emergency Braking, Blind Spot Monitoring, Lane Keep Assist និង Adaptive Cruise Control។ បន្ថែមពីនេះក៏មានដំបូលថ្លាអាចបើកបាន, អេក្រង់ Touch ទំហំ ៨ អ៊ីញជាមួយមុខងារនាំផ្លូវ, ប្រព័ន្ធ Bluetooth ហើយផ្នែកខាងក្នុងរថយន្តមានទំហំធំទូលាយ។ រថយន្ត MG ZS EV នឹងចាប់ផ្ដើមបញ្ចេញលក់នៅខែកញ្ញា ឆ្នាំ ២០១៩ នេះ៕

ផ្ទាំងផ្សាយពាណិជ្ជកម្ម