Subaru បង្ហាញរូបភាព Teaser នៃគំរូរថយន្ត STI E-RA មុនពេលបង្ហាញខ្លួននៅ Tokyo Auto Salon ២០២២

[បរទេស] ក្រុមហ៊ុន Subaru បានបង្ហាញរូបភាព Teaser នៃគំរូរថយន្ត STI E-RA Concept ថ្មី ដែលជារថយន្តស្ព័រអគ្គិសនីនៅមុនការបង្ហាញខ្លួនជាសាធារណៈរបស់ខ្លួននៅឯ Tokyo Auto Salon ឆ្នាំ ២០២២ ចាប់ពីថ្ងៃទី ១៤ ដល់់ ១៦ ខែមករា។

គំរូរថយន្ត Subaru STI E-RA គឺជាគំរូរថយន្តរបស់ក្រុមហ៊ុន Subaru ដែលឆ្លុះបញ្ចាំងពីការអភិវឌ្ឍន៍នាពេលអនាគតនៃរថយន្តអគ្គិសនី។ តាម​រូបភាព​បង្ហាញ​ពី​ការ​រចនា​ចង្កៀងខាង​មុខ​​ជា​រាង​អក្សរ C ជាមួយនឹងនិមិត្តសញ្ញា STI ពណ៌ក្រហមភ្លឺនៅចំកណ្តាល ខណៈពេលដែលកម្របម៉ាស៊ីនត្រូវបានរចនាឡើងជាមួយនឹងបំពង់ខ្យល់ទំហំធំ។ ដែលបង្ហាញ​ពី​ការ​យកចិត្តទុកដាក់របស់​ក្រុមហ៊ុន Subaru ដែល​ចង់​អភិវឌ្ឍ​​រថយន្តបែប​ស្ព័ររបស់ខ្លួន។

ផ្ទាំងផ្សាយពាណិជ្ជកម្ម

ក្នុងនោះដែរ ក្រុមហ៊ុន Subaru ក៏នឹងបង្ហាញនៅគំរូរថយន្ត២បន្ថែមទៀតគឺ WRX S4 STI Performance Concept ដែលផ្អែកលើគ្រោងឆ្អឹង WRX S4 STI Sport R និងទទួលបានពណ៌ Cherry Red, កាងលំអខាងក្រោយប្រភេទ Carbon និងបំពង់ស៊ីមាំងស្ព័រ រួមទាំងគំរូ Levorg STI Performance Concept ដែលត្រូវបានតុបតែងតាមរបៀបស្រដៀងគ្នា ប៉ុន្តែ​វា​បាន​ភ្ជាប់​មក​ជា​មួយ​នឹង​តួ​រថយន្ត​ប្រភេទ Wagon រួម​ទាំង​រថយន្ត​ប្រណាំង BRZ GT300 ២០២១ ដែល​ទើប​ឈ្នះ​ថ្មីៗ​នេះ មួយផ្សេងទៀតផងដែរ។

ក្នុងនោះក៏នឹងមានរថយន្ត Special edition មួយដែលត្រូវបញ្ចេញនៅក្នុងព្រឹត្តិការណ៍នោះគឺ BRZ STI Performance ដែលត្រូវបានបង្កើតឡើងដោយផ្អែកលើគ្រោងឆ្អឹងរបស់ BRZ Model S ដែលបានបញ្ចេញនៅក្នុងប្រទេសជប៉ុន រួមជាមួយនឹងឈុតខាងក្រៅពណ៌ក្រហម cherry ដើម្បីធ្វើឱ្យវាកាន់តែស្រស់ស្អាតថែមទៀត ៕

ផ្ទាំងផ្សាយពាណិជ្ជកម្ម