ក្រុមហ៊ុនរថយន្តអង់គ្លេស Jaguar បានប្រកាសចេញរថយន្ត E-Pace ស៊េរីឆ្នាំ២០២១ របស់ខ្លួនជាផ្លូវការ ដោយបានអាប់ដេតលើការឌីហ្សាញផ្នែកខាងក្រៅ ក៏ដូចជាបំពាក់ប្រព័ន្ធកម្សាន្តកាន់តែវៃឆ្លាតទៀតផង។
រថយន្ត SUV ខ្នាតតូចដែលមានតម្លៃថោកបំផុតរបស់ក្រុមហ៊ុន Jaguar នេះ បានបំពាក់ចង្កៀងមុខប្រភេទ LED ជាមួយនឹងអំពូលបំភ្លឹពេលថ្លស រាងអក្សារ J ២ជាន់ ហើយមានប៉ាណាមុខ និងរន្ធបឺតខ្យល់ស្អំម៉ាស៊ីនដ៏ធំ ដែលមើលទៅពិតជាស៊ីគ្នាមែនទែន។
ទោះជាយ៉ាងណាក៏ដោយ ការអាប់ដេតភាគច្រើនគឺត្រូវធ្វើឡើងនៅផ្នែកខាងក្នុង ដោយ Jaguar E-Pace ឆ្នាំ២០២១ មានបំពាក់អេក្រង់កម្សាន្ត Touchscreen ទំហំ ១១,៤អ៊ីញ ដោយអេក្រង់នេះមានបច្ចេកវិទ្យាការពារចំណាំង និងងាយជូតស្នាមម្រាមដៃចេញ។
មិនតែប៉ុណ្ណោះ សូម្បីតែកុងទ័ររបស់វាក៏ជាប្រភេទឌីជីថល ទំហំ ១២,៣អ៊ីញ ដែលបង្ហាញរូបភាពបានច្បាស់ត្រជាក់ភ្នែក និងមានមុខងារដ៏សម្បូរបែប ជាពិសេសអាចបង្ហាញផែនទី នៅលើនោះបានទៀតផង។ លើសពីនេះវាក៏មានមុខងារ ClearSight ដែលថតយកទិដ្ឋភាពនៅខាងក្រោយរថយន្ត មកបង្ហាញនៅលើកញ្ចក់មើលក្រោយ ព្រមទាំងមុខងារ 3D Surround-View Camera System ដែលអាចមើលឃើញជុំវិញរថយន្ត ៣៦០ដឺក្រេ តែម្តង។
E-Pace ថ្មី នឹងផ្តល់ជម្រើស ៣ ម៉ូដែល គឺ P250, P250 SE និង 300 Sport ដែលប្រើប្រាស់ម៉ាស៊ីនចំណុះ ២,០លីត្រ turbocharged ទំហំ ៤ស៊ីឡាំង មកស្តង់ដារ ជាមួយប្រអប់លេខអូតូ ៩វគ្គ និង ប្រព័ន្ធប៉ុងពីរ ប៉ុន្តែកម្លាំងរបស់វាគឺខុសគ្នា។ ម៉ូដែល P250 និង P250 SE មានកម្លាំង ២៤៦សេះ ខណៈ 300 Sport ឡើងដល់ ២៩៦សេះ។
រថយន្ត Jaguar E-Pace ឆ្នាំ២០២១ នឹងមានតម្លៃចាប់ពី ៤០ ៩៩៥ដុល្លារ សម្រាប់ម៉ូដែល P250, ចាប់ពី ៤៦ ០៩៥ដុល្លារ សម្រាប់ P250 SE និង ចាប់ពី ៤៩ ៩៩៥ដុល្លារ សម្រាប់ 300 Sport៕
