[ទីផ្សារបរទេស] ក្រុមហ៊ុន Toyota កំពុងតែស្ថិតនៅក្នុងស្ថានភាពល្អមួយក្នុងការក្លាយខ្លួនជាក្រុមហ៊ុនផលិតរថយន្តធំលំដាប់លេខមួយរយៈពេលបីឆ្នាំជាប់គ្នា បន្ទាប់ពីក្រុមហ៊ុនបានចាប់ផ្ដើមទំព័រឆ្នាំ២០២២យ៉ាងខ្លាំងក្លាជាង Volkswagen Group។
រយៈពេលបួនខែដំបូងនៃឆ្នាំនេះ Toyota អាចលក់ចេញរថយន្តបានសរុប ៣ ៤២៩ ៦៣៦គ្រឿង រាប់បញ្ចូលទាំងរថយន្តរបស់ម៉ាក Daihatsu និង Hino ផងដែរ។ ត្បិតថាតួលេខនេះធ្លាក់ចុះ ៥,៨% ធៀបនឹង៤ខែដំបូងនៃឆ្នាំ២០២១ ប៉ុន្តែ Toyota នៅអាចនាំមុខគូប្រជែងបានយ៉ាងងាយ ដោយមានចំនួនលក់លើសគូប្រជែងជាង ១លានគ្រឿងឯណោះ។
នៅឆ្នាំ២០២២នេះ មានរថយន្តសរុប ១ ២៧៥ ៥៧០គ្រឿង ត្រូវបាន Toyota ផលិតបាននៅប្រទេសចិន ខណៈដែលរថយន្ត ២ ១៩៩ ១៣៦គ្រឿង ផលិតបាននៅទីផ្សារបរទេស។ ផលិតកម្មលើទីផ្សារបរទេសមានការកើនឡើង ៤,៧% ខណៈដែលការផលិតក្នុងស្រុកថយចុះ ១២,៤%។ ការផលិតសរុបគឺមានចំនួន ៣ ៤៧៤ ៧០៦គ្រឿង ដែលថយចុះ ២,៣%។
ក្នុងកម្រិតបច្ចុប្បន្ននេះ Toyota ទំនងជាអាចផលិតរថយន្តបានជាង ១០,៤លានគ្រឿង នៅពេញមួយឆ្នាំ២០២២នេះ ដែលអាចឲ្យក្រុមហ៊ុនគ្រងតំណែងជាក្រុមហ៊ុនផលិតរថយន្តលេខមួយក្នុងលោក។
គួរដឹងថា ហេតុផលមួយដែល Volkswagen Group ធ្វើមិនសូវបានល្អដូចជា Toyota ក៏ដោយសារក្រុមហ៊ុន Volkswagen Group មានចំណែកទីផ្សារច្រើននៅលោកខាងលិច ដែលជាតំបន់មួយកំពុងប្រឈមនឹងបញ្ហាផ្គត់ផ្គង់ ដោយសារវិបត្តិសង្គ្រាមនៅប្រទេសអ៊ុយក្រែនដែលកំពុងបន្ត៕
