ក្រុមហ៊ុន Toyota បានប្រកាសចេញរថយន្ត Corolla Cross សម្រាប់ទីផ្សារសហរដ្ឋអាមេរិក កាលពីដើមឆ្នាំកន្លងទៅ ហើយឥឡូវនេះវាក៏បានប្រកាសតម្លៃជាផ្លូវការដែរ គឺចាប់ពី ២២ ១៩៥ដុល្លារ ហើយនឹងត្រូវចេញលក់នៅខែក្រោយ។
រថយន្ត Toyota Corolla Cross ឆ្នាំ២០២២ ចែកចេញជា ៣ ម៉ូដែល គឺ Corolla Cross L តម្លៃចាប់ពី ២២ ១៩៥ដុល្លារ, Corolla Cross LE តម្លៃចាប់ពី ២៤ ៥៤៥ដុល្លារ និង Corolla Cross XLE តម្លៃចាប់ពី ២៦ ៣២៥ដុល្លារ។
រថយន្ត SUV ខ្នាតតូចនេះប្រើម៉ាស៊ីនសាំងចំណុះ ២,០លីត្រ ទំហំ ៤ស៊ីឡាំង មានកម្លាំង ១៦៩សេះ និងកម្លាំងរមួល ២០៣ញ៉ូតុនម៉ែត្រ ហើយប្រើប្រអប់លេខអូតូ CVT និងប៉ុងមួយវិលកង់មុខ។ ទោះជាយ៉ាងណាក៏ដោយ អតិថិជនក៏អាចបន្ថែម Option ប៉ុងពីរបានដែរ ក្នុងតម្លៃ ១ ៣០០ដុល្លារទៀត។
ក្រៅពីនោះ អតិថិជនក៏អាចបន្ថែម Option ផ្សេងទៀតដូចជា បាស JBL ៩គ្រាប់ និង ប្រព័ន្ធចង្កៀងមុខ Adaptive Front Lighting System ខណៈក្រុមហ៊ុន Toyota ក៏មានផ្តល់នូវកញ្ចប់ Option “Convenience Package” ដែលមានដំបូល Moonroof និង ឃ្លុបក្រោយអូតូទៀតផង៕
