[ទីផ្សារបរទេស] ក្រុមហ៊ុនផលិតរថយន្ត Toyota ប្រចាំនៅសហរដ្ឋអាមេរិក បានធ្វើការដាក់បង្ហាញចេញតម្លៃលក់ជាផ្លូវការរបស់រថយន្ត Toyota Land Cruiser ស៊េរីឆ្នាំ ២០២៤ ដែលមាន ៣ម៉ូដែល ជាមួយតម្លៃលក់ចាប់ពី ៥៥ ៩៥០ ដុល្លារ ដល់ ៧៤ ៩៥០ ដុល្លារ ។
សម្រាប់ម៉ូដែលទាំង ៣ នេះ ត្រូវបានបំពាក់ជាមួយម៉ាស៊ីនកូនកាត់ i-Force Max Hybrid ធ្វើការរួមគ្នាជាមួយម៉ាស៊ីនសាំងចំណុះ ២,៤លីត្រ Turbo ទំហំ ៤ស៊ីឡាំង អាចផលិតកម្លាំងបាន ៣២៦ សេះ និងកម្លាំងរមួល ៦៣០ ញ៉តុនម៉ែត្រ ភ្ជាប់ដោយប្រអប់លេខអូតូ ៨វគ្ក និងអាគុយទំហំ ១,៨៧គីឡូវ៉ាត់ម៉ោង ប្រភេទបើកបរប៉ុង ២ Full-time 4-wheel drive ។ លើសពីនេះ ក៏ទទួលបានកញ្ចប់ប្រព័ន្ធសុវត្ថិភាព Toyota Safety Sense 3.0 ផងដែរ ។
Toyota Land Cruiser ស៊េរីឆ្នាំ ២០២៤ ត្រូវបានភ្ជាប់មកជាមួយ ប៉ាណាមុខថ្មីរចនារាងសំណាញ់ ចង្កៀងមុខ-ក្រោយ LED ដំបូល roof-rack ថាសកង់ស្ព័រទំហំ ១៨អ៉ីញ ក៏ដូចជាទ្វារឃ្លុបក្រោយបើក-បិទដោយថាមពលអគ្គិសនី ។
ចំពោះនៅផ្នែកខាងក្នុងវិញ មានបំពាក់កុងទ័របង្ហាញឌីជីថល ៧អ៉ីញ និងអេក្រង់កំសាន្ត touchscreen ទំហំចាប់ពី ៨-១២,៣ អ៉ីញ អាចភ្ជាប់មុខងារ Apple CarPlay និង Android Auto ក៏ដូចជាឧបករណ៍បំពងសំឡេងម៉ាក JBL អេក្រង់បង្ហាញលើកញ្ចក់ HUD និងមួយចំនួនច្រើនទៀតផងដែរ ៕
