Volvo នឹងលក់តែឡានអគ្គិសនីសុទ្ធត្រឹមឆ្នាំ ២០៣០

ក្រុមហ៊ុនរថយន្ត Volvo បានប្រកាសអំពីផែនការថានឹងលក់តែរថយន្តប្រើប្រាស់ថាមពលអគ្គិសនីតែមួយគត់នៅត្រឹមឆ្នាំ ២០៣០ ដោយបញ្ឈប់ការលក់រថយន្តដើរដោយថាមពលប្រេងឥន្ធនៈ។ ក្រុមហ៊ុននេះក៏មានផែនការលក់រថយន្តអគ្គិសនីនៅលើអនឡាញ ដើម្បីសាងទំនាក់ទំនងជាមួយអតិថិជនដោយផ្ទាល់តែម្ដង។

ការសម្រេចចិត្តថានឹងក្លាយខ្លួនជាក្រុមហ៊ុនរថយន្តអគ្គិសនីទាំងស្រុងនេះ គឺជាផែនការបន្ថែមពីលើផែនការពីមុន ដែលក្រុមហ៊ុនធ្លាប់បានឲ្យដឹងថា ៥០% នៃសែស្រឡាយរថយន្តរបស់ខ្លួននឹងមានការប្រើប្រាស់ថាមពលអគ្គិសនីសុទ្ធនៅត្រឹមឆ្នាំ ២០២៥។

លោក Henrik Green ជាប្រធានផ្នែកបច្ចេកវិទ្យារបស់ Volvo បាននិយាយថា ៖ “មិនមានអនាគតយូរអង្វែងនោះទេ សម្រាប់រថយន្តដែលដើរដោយថាមពលប្រេងឥន្ធនៈ។ យើងតាំងចិត្តក្នុងការក្លាយជាក្រុមហ៊ុនផលិតរថយន្តអគ្គិសនីតែមួយគត់ ហើយវាអាចកើតមានឡើងត្រឹមឆ្នាំ ២០៣០៕”