បន្ទាប់ពីបានបង្ហាញចេញនៅក្នុងពិពណ៌រថយន្ត Chengdu ឆ្នាំ ២០២៥ ពេលនេះ ក្រុមហ៊ុនផលិតរថយន្ត Voyah បានធ្វើការប្រកាសចេញលក់ជាផ្លូវការនូវរថយន្តអគ្គិសនីសុទ្ធ Voyah Courage EV ស៊េរីថ្មីចុងក្រោយរបស់ខ្លួនហើយ ដោយក្នុងនោះ គឺមានតម្លៃលក់ចាប់ពី ២៨ ២០០ ដុល្លារ ដល់ ៣៣ ៨០០ដុល្លារ តែប៉ុណ្ណោះ នៅក្នុងទីផ្សារប្រទេសចិន។
រថយន្តប្រភេទ SUV ខ្នាតកណ្តាលនេះ មានប្រវែងតួខ្លួនសរុប ៤ ៨១០ ម.ម ទទឹង ១ ៩០០ ម.ម កម្ពស់ ១ ៦៣៦ ម.ម និងប្រវែងគម្លាតកង់មុខ-ក្រោយ ២ ៩២៥ ម.ម ដំណើរការដោយ៖
- ម៉ូទ័រអគ្គិសនីចំនួន ១ (RWD) អាចផលិតកម្លាំងបាន ៣០៨ សេះ
- ម៉ូទ័រអគ្គិសនីចំនួន ២ (AWD) អាចផលិតកម្លាំងបាន ២៣៥ និង ៣០៨ សេះ
ក្នុងនោះ រថយន្តនេះក៏ទទួលបាននូវអាគុយទំហំ ៨១ គីឡូវ៉ាត់ម៉ោង ផងដែរ ពោលគឺអាចបើកបរបានចម្ងាយ ៦៥០ គីឡូម៉ែត្រ នៅពេលសាកថ្មពេញម្តង។ លើសពីនេះ ក៏ទទួលបាននូវបច្ចេកវិទ្យាសាកថ្មល្បឿនលឿនផងដែរ ពោលគឺ សាកថ្មត្រឹម ១៥នាទី ប៉ុណ្ណោះ អាចបើកបរបានចម្ងាយខ្ទង់ ៥០០ គីឡូម៉ែត្រ ។
សម្រាប់ការរចនាផ្នែកខាងក្រៅវិញ ទទួលបាននូវអេក្រង់ Flashing Star River Smart Light Screen ទំហំ ៤៦,៧៥ អ៊ីញ នៅលើផ្នែកខាងមុខ ដែលប្រព័ន្ធនេះគឺគាំទ្រការបង្ហាញស្ថានភាពសាកថ្មជាដើម។ លើសពីនេះ ក៏ទទួលបាននូវប្រព័ន្ធ Huawei Qiankun ADS 4 intelligent driving និងប្រព័ន្ធ HarmonySpace 5 smart cockpit ដែលរួមបញ្ជូលនូវអេក្រង់កុងទ័រទំហំ ១០,២៥អ៊ីញ, អេក្រង់ AR-HUD និងអេក្រង់កម្សាន្ត Touchscreen ទំហំ ១៥,៦ អ៊ីញ ផងដែរ៕
