ក្រុមហ៊ុន Volkswagen Anhui បានដាក់សម្ពោធជាផ្លូវការនូវរថយន្ត SUV អគ្គិសនីសុទ្ធម៉ូឌែលថ្មីសន្លាងគឺ ID. Unyx 08 កាលពីថ្ងៃទី១៦ ខែមេសា។ រថយន្តនេះត្រូវបានអភិវឌ្ឍឡើងក្រោមកិច្ចសហការជាមួយក្រុមហ៊ុន Xpeng ជាម៉ូឌែលផលិតក្នុងទ្រង់ទ្រាយធំដំបូងគេបង្អស់នៃភាពជាដៃគូ ដោយផ្ដល់មកជាមួយ បីជម្រើសផ្សេងគ្នា ដាក់លក់ក្នុងតម្លៃចាប់ពី ៣៣ ៣០០ ដល់ ៤២ ០០០ ដុល្លារ។
រថយន្តអគ្គិសនី ID. Unyx 08 បង្ហាញនូវភាសារចនាថ្មីរបស់ Volkswagen ផ្ទៃខាងមុខនៃរថយន្តនេះ បំពាក់ដោយភ្លើង LED ជាង ៤០០ គ្រាប់ អាចបញ្ជាដាច់ដោយឡែកពីគ្នាបាន ដើម្បីគាំទ្រដល់មុខងារពន្លឺអន្តរកម្ម ដែលអាចកំណត់តាមតម្រូវការបាន។ ផ្នែកខាងក្នុងបានបំពាក់ជាមួយកុងទ័រឌីជីថលទំហំ ១០.២៥ អុីញ និងអេក្រង់កម្សាន្ដភ្លោះកម្រិត ២.៤K ទំហំ ១៤.៩៦ អុីញ ដំណើរការដោយបន្ទះឈីប Qualcomm Snapdragon SA8295P។ បន្ថែមពីនេះរថយន្ដនេះក៏បានបំពាក់នូវប្រព័ន្ធជំនួយការវៃឆ្លាត AI ផងដែរ។
ចំពោះទំហំឃ្លប់ក្រោយមានទំហំ ៧៦៦ លីត្រ ហើយអាចពង្រីកបានរហូតដល់ ១ ៨៤៥ លីត្រ នៅពេលបត់កៅអីជួរក្រោយចុះ។ កៅអីជួរមុខមានមុខងារអាចបញ្ជាដោយអគ្គិសនីបាន ១២ របៀប មានមុខងារម៉ាស្សាចំនួន ១០ចំណុច ព្រមទាំងមានមុខងារខ្យល់ក្ដៅនិងខ្យល់ត្រជាក់។
រថយន្តអគ្គិសនី ID. Unyx 08 ក៏គាំទ្រកសាកសាកថ្ម 800V និងផ្ដល់មកាមួយជម្រើសប្រើប្រាស់ម៉ូទ័័រចំនួន១ នៅប៉ុងខាងក្រោយ (RWD) និងជម្រើសម៉ូទ័រចំនួន២ (AWD)។ សម្រាប់ម៉ូឌែល (AWD) អាចជាន់ស្ទុះពី ០ ដល់ ១០០ គីឡូម៉ែត្រ/ម៉ោង ប្រើពេលត្រឹមតែរយៈពេល ៤.៩ វិនាទី និងមានល្បឿនអតិបរមា ២០០ គីឡូម៉ែត្រ/ម៉ោង។ សម្រាប់ជម្រើសអាគុយរបស់រថយន្ត ID. Unyx 08 បំពាក់ជាមួយអាគុយ Lithium Iron Phosphate របស់ក្រុមហ៊ុន CATL ទំហំ ៨២ គីឡូវ៉ាត់ម៉ោង និង ៩៥ គីឡូវ៉ាត់ម៉ោង៖
- ទំហំ ៨២ គីឡូវ៉ាត់ម៉ោង៖ អាចបើកបរបានចម្ងាយ ៦៣០ គីឡូម៉ែត្រ
- ទំហំ ៩៥ គីឡូវ៉ាត់ម៉ោង៖ អាចបើកបរបានចម្ងាយរហូតដល់ ៧៣០ គីឡូម៉ែត្រ
