ក្រុមហ៊ុន SAIC បានប្រកាសដាក់លក់ជាផ្លូវការនូវរថយន្ត SUV អគ្គិសនីសុទ្ធខ្នាតតូច ស៊េរីថ្មីចុងក្រោយរបស់ខ្លួនដែលមានឈ្មោះថា MG 4X ផ្ដល់មកជាមួយជម្រើស ៤ម៉ូឌែលផ្សេងគ្នាជាមួយចន្លោះពី ១៤ ៧០០ ដុល្លារ រហូតដល់ ១៧ ២០០ ដុល្លារអាមេរិក។ គួរបញ្ជាក់ផងដែរតួរលេខនេះក៏ជាតម្លៃសម្រាប់ការកក់ទុកមុនដោយមិនទាន់ឃើញឡានពិត Blind pre-orders។ ហើយអ្វីកាន់តែពិសេស អតិថិជនក៏អាចទទួលបានអត្ថប្រយោជន៍ពីតម្លៃប្រូម៉ូសិនពិសេស ដែលធ្វើឲ្យតម្លៃចាប់ផ្តើមដំបូងបង្អស់ធ្លាក់ចុះមកត្រឹមតែ ១៣ ៦០០ ដុល្លារ។
រថយន្ដអគ្គិសនី MG 4X ត្រូវបានបង្កើតឡើងនៅលើគ្រោងឆ្អឹងផលិយសម្រាប់រថយន្តអគ្គិសនីសុទ្ធដែលមានឈ្មោះថា “Nebula” របស់ក្រុមហ៊ុន SAIC ត្រូវបានរួមបញ្ចូលគ្នារវាងសមត្ថភាពបើកបរបែប Performance និងភាពឆ្លាតវៃ ដោយមានបំពាក់នូវប្រព័ន្ធបើកបរបង្វិលកង់ក្រោយនិងប្រព័ន្ធបូមក្រោយឯករាជ្យ Five-link independent rear suspension។
បើក្រឡេកទៅការរចនារថយន្ដនេះនៅតែបន្តរក្សាប្រើប្រាស់ភាសរចនាក្នុងត្រកូលរថយន្ដ MG4 ដដែល ដោយមានបំពាក់នូវប៉ាណាមុខបិទជិត, ចង្កៀងបំភ្លឺពេលថ្ងៃប្រភេទ LED រាងផ្តេក និងឡូហ្គោដែលមានពន្លឺភ្លឺ។ សម្រាប់ទំហំរូបរាងខាងក្រៅរថយន្ដ MG 4X មានប្រវែងបណ្ដោយ ៤ ៥០០ មីលីម៉ែត្រ ទទឹង ១ ៨៤៩ មីលីម៉ែត្រ កម្ពស់ ១ ៦២១ មីលីម៉ែត្រ និងប្រវែងគម្លាតកង់មុខក្រោយ ២ ៧៣៥ មីលីម៉ែត្រ។
ចូលមកដល់ផ្នែកខាងក្នុងកាប៊ីនមានបំពាក់នូវកុងទ័រឌីជីថលទំហំ ១០.២៥ អ៊ីញ និងអេក្រង់កម្សាន្ត Touchscreen ទំហំ ១៥.៦ អ៊ីញ។ ប្រព័ន្ធកម្សាន្តនៅក្នុងរថយន្ដនេះ ត្រូវបានរួមបញ្ចូលគ្នាជាមួយបច្ចេកវិទ្យា AI ជំនាន់ថ្មីដែលមានឈ្មោះថា Doubao large language model គាំទ្រការបញ្ជាដោយសំឡេងបែងចែកជាបួនតំបន់ ព្រមទាំងប្រព័ន្ធភ្ជាប់ទំនាក់ទំនងស្មាតហ្វូនយ៉ាងទូលំទូលាយ រួមមានមុខងារ CarPlay, HiCar, Carlink និងប្រព័ន្ធអេកូឡូស៊ីឆ្លាតវៃរបស់ Oppo ផងដែរ។
បើនិយាយពីកម្រិយសមត្ថភាពរថយន្ត MG 4X ផ្តល់ជូននូវជម្រើសកម្លាំងចំនួនពីរប្រភេទផ្សេងគ្នាដោយក្នុងនោះ មានជម្រើសអាចផលិតកម្លាំងថាមពលអតិបរមាបាន ១៦៨ កម្លាំងសេះ និងកម្លាំង ២០១ សេះ។ បន្ថែមពីនេះរថយន្តនេះត្រូវបានបំពាក់ដោយអាគុយប្រភេទរាវ-រឹង លីចូម-អុីយ៉ុង ផ្អែកលើសារធាតុម៉ង់ហ្គាណែស ទំហំ ៥៣.៩ គីឡូវ៉ាត់ម៉ោង ផលិតដោយក្រុមហ៊ុន Qingtao ឬក៏ជម្រើសអាគុយប្រភេទលីចូមអ៊ុតផូស្ហ្វាត (LFP) ទំហំ ៦៤.២ គីឡូវ៉ាត់ម៉ោង (kWh) ផលិតដោយក្រុមហ៊ុន CATL ផ្តល់នូវចម្ងាយបើកបរ បានរហូតដល់ ៥១០ គីឡូម៉ែត្រ និង ៦១០ គីឡូម៉ែត្រ គិតតាមស្តង់ដារវាស់ចម្ងាយ CLTC អាស្រ័យតាមម៉ូឌែលនីមួយៗ៕
