ញាក់សាច់! ចំនួនកក់ឡានភីកអាប់អគ្គិសនី Tesla Cybertruck ឡើងដល់ជាង ១លានគ្រឿង

វាមានរយៈពេលជិត ២ឆ្នាំមកហើយ ដែលរថយន្តភីកអាប់អគ្គិសនី Tesla Cybertruck បានបង្ហាញខ្លួនជាគំរូរថយន្ត។ កាលនោះ លោក Elon Musk បានអះអាងថា Cybertruck នឹងចេញលក់នៅក្នុងឆ្នាំ២០២១ ប៉ុន្តែរហូតមកដល់ពេលនេះ នៅមិនទាន់ឃើញផ្លែផ្កាឡើយ។

ថ្វីបើបែបនេះក្តី ប៉ុន្តែក្រុមហ៊ុន Tesla នៅតែទទួលបានចំនួនកក់ច្រើនសម្រាប់ Cybertruck។ របាយការណ៍ថ្មីមួយបានឲ្យដឹងថា រហូតមកទល់ពេលនេះ រថយន្ត Tesla Cybertruck មានគេកក់ចំនួន ១ ២៥៤ ៨៧២គ្រឿងបាត់ទៅហើយ បើគិតជាលុយគឺស្មើនឹង ៧៩ពាន់លានដុល្លារ បើអ្នកកក់ទាំងអស់ទិញរថយន្តនេះ។

ផ្ទាំងផ្សាយពាណិជ្ជកម្ម

វាជាចំនួនមួយដ៏គួរឲ្យភ្ញាក់ផ្អើលខ្លាំង នៅពេលដែលអ្នកពិចារណាថា ការឌីហ្សាញចុងក្រោយនៃភីកអាប់នេះ នៅមិនទាន់ត្រូវបានបង្ហាញនៅឡើយ។ ដោយឡែក បើប្រៀបធៀបជាមួយនឹងរថយន្តអគ្គិសនី Ford F-150 Lightning វិញ ទើបតែទទួលបានការកក់ចំនួន ១២០ ០០០គ្រឿងប៉ុណ្ណោះ ចាប់តាំងពីបង្ហាញខ្លួននៅខែឧសភាកន្លងមក។

គួរឲ្យដឹងថា រថយន្ត Cybertruck ប្រភេទមានប្រជាប្រិយភាពបំផុត គឺ Dual-Motor ដែលទទួលបានការកក់ដល់ ៤៨ភាគរយ។ វាអាចរត់បានចម្ងាយដល់ ៣០០ម៉ាយ៍ ឬ ៤៨០គីឡូម៉ែត្រ នៅពេលសាកភ្លើងពេញម្តង ហើយថែមទាំងអាច់រត់ស្ទុះពីកុងទ័រ ០-១០០គីឡូម៉ែត្រ ប្រើពេលត្រឹមតែ ៤,៥វិនាទីប៉ុណ្ណោះ៕

ផ្ទាំងផ្សាយពាណិជ្ជកម្ម