ក្រុមហ៊ុន Toyota ទើបតែបានប្រកាសចេញរថយន្តស្ព័រ GR Supra ម៉ូដែលពិសេសថ្មី ហៅថា Toyota GR Supra GT4 “50 Edition” ដែលនឹងផលិតមានចំនួនកំណត់ ត្រឹមតែ ៦គ្រឿងប៉ុណ្ណោះ នៅលើលោក។
គួររំលឹកឲ្យដឹងដែរថា វាមានរយៈពេល ២៤ខែហើយ ដែលការលក់រថយន្ត GR Supra GT4 បានចាប់ផ្តើមនៅលើទីផ្សារអឺរ៉ុប មុនពេលចេញលក់នៅ អាមេរិកខាងជើង, ជប៉ុន និង អាស៊ី កាលពីខែតុលា ឆ្នាំ២០២០។ ក្នុងនោះ Toyota បានលក់ដាច់រថយន្ត GR Supra GT4 ទាំង ៥០គ្រឿង នៅត្រឹមចុងឆ្នាំ២០២១ ហើយពួកវាបានចូលរួមក្នុងការប្រកួតច្រើនជាង ២៥០ និងបានឈ្នះ ៣៦ប្រកួតឯណោះ។
យ៉ាងណាមិញ រថយន្ត Toyota GR Supra GT4 “50 Edition” នេះ ត្រូវបានបង្កើតឡើងដើម្បីអបអរការលក់ នៃ GR Supra GT4 ទាំង ៥០គ្រឿងនោះ។ ទោះបីជាយ៉ាងណាក៏ដោយ ចំពោះទីផ្សារអាស៊ី, អឺរ៉ុប និង អាមេរិកខាងជើង នឹងទទួលបានតែ ២គ្រឿងម្នាក់ប៉ុណ្ណោះ ជាមួយនឹងតម្លៃ ១៩២ ៩០០ដុល្លារ។
រថយន្ត Toyota GR Supra GT4 “50 Edition” មានបំពាក់ម៉ាស៊ីនសាំងចំណុះ ៣,០លីត្រ turbocharged ទំហំ ៦ស៊ីឡាំង ដែលបង្កើតកម្លាំងបាន ៤៣០សេះ ដំណើរការជាមួយប្រអប់លេខអូតូ ៧វគ្គ និង មុខងារ mechanical limited-slip differential ហើយមានទម្ងន់ស្រាលជាងម៉ូដែលធម្មតា ១៤៥គីឡូក្រាមឯណោះ៕
