ឡាន Toyota Mirai ចាក់អ៉ីដ្រូហ្សែនមួយពេញជិះបាន ១៣៦០គ.ម ក្លាយជាកំណត់ត្រាពិភពលោកថ្មី

រថយន្ត Toyota Mirai មួយគ្រឿង ទទួលបានកំណត់ត្រាពិភពលោកជារថយន្តអ៉ីដ្រូហ្សែនដែលបើកបរបានចម្ងាយឆ្ងាយជាងគេ ដោយមិនចាក់បំពេញអ៉ីដ្រូហ្សែនបន្ថែមឡើយ។ រថយន្តនេះអាចបើកបរបានចម្ងាយរហូតដល់ ១៣៦០គ.ម ពេលបើកបរនៅភាគខាងត្បូង California កាលពីខែសីហា។

រថយន្ត Toyota Mirai ដែលជាប់កំណត់ត្រាពិភពលោកនេះបានធ្វើដំណើររយៈពេលពីរថ្ងៃ គឺនៅថ្ងៃទី២៣ និងទី២៤ ខែសីហា ដោយវាបានចាក់អ៉ីដ្រូហ្សែនតែមួយលើកប៉ុណ្ណោះ គឺពេលចាប់ផ្ដើមចេញដំណើរ ដែលប្រើពេល ៥នាទី។

ផ្ទាំងផ្សាយពាណិជ្ជកម្ម

ចំណុចចាប់ផ្ដើមនៃដំណើរប្រវែងជាង ១ពាន់គីឡូម៉ែត្រនេះគឺនៅទីតាំងមជ្ឈមណ្ឌលបច្ចេកទេស Toyota នៅក្រុង Gardena រដ្ឋ California ដោយថ្ងៃដំបូងគេបានបើកបរអស់ចម្ងាយ ៧៦១គីឡូម៉ែត្រ និងថ្ងៃបន្ទាប់មកទៀត បន្តបើកបរចម្ងាយ ៥៩៩គីឡូម៉ែត្របន្ថែមទៀត។

រយៈពេលពីរថ្ងៃនេះ រថយន្ត Mirai បានប្រើប្រាស់អ៉ីដ្រូហ្សែនអស់ចំនួន ៥,៦៥គីឡូក្រាម ដែលមិនមានបញ្ចេញឧស្ម័នកាបូនិចទៅក្នុងបរិយាកាសឡើយ គឺបញ្ចេញតែចំហាយទឹកមួយចំនួនប៉ុណ្ណោះ។ Toyota បានប៉ាន់ស្មាន សម្រាប់រថយន្តម៉ាស៊ីនពីស្តុងប្រហែលជាអាចបញ្ចេញឧស្ម័នពុលកាបូនិចចំនួន ៣០១គីឡូក្រាម ក្នុងរយៈចម្ងាយបើកបរដូចគ្នានេះ៕

ផ្ទាំងផ្សាយពាណិជ្ជកម្ម