ក្រុមហ៊ុនផលិតអាគុយរបស់ចិនឈ្មោះថា CATL និយាយថាខ្លួនបានត្រៀមខ្លួនរួចរាល់ក្នុងការចាប់ផ្ដើមផលិតអាគុយសម្រាប់រថយន្តដែលអាចប្រើបានចម្ងាយ ២លានគីឡូម៉ែត្រ និងមានអាយុកាលដល់ ១៦ឆ្នាំ។
គួរដឹងក្រុមហ៊ុន CATL នេះមានអតិថិជនធំៗដូចជា Tesla, BMW, Daimler, Honda, Toyota, Volkswagen និង Volvo ផងដែរ។ ក្រុមហ៊ុននេះធ្លាប់បាននិយាយបើកចំហអំពីការបង្កើតអាគុយដែលអាចប្រើបានចម្ងាយ ១លានម៉ាយ ជាមួយ Tesla។ ប៉ុន្តែអាគុយដែលក្រុមហ៊ុនផលិតបានសម្រេចនេះ មិនច្បាស់ថាជាការសហការជាមួយ Tesla ឬយ៉ាងណានោះទេ។
យ៉ាងណាក្ដីលោក Zeng Yuqun នាយកប្រតិបត្តិ CATL និយាយថាក្រុមហ៊ុនបានត្រៀមខ្លួនរួចជាស្រេច ក្នុងការទទួលយកការកុម្ម៉ង់ទិញអាគុយនេះ។ លោក Zeng បានបញ្ជាក់ដែរថាអាគុយនេះនឹងមានតម្លៃថ្លៃលើសអាគុយធម្មតាដែលខ្លួនធ្លាប់បានផ្គត់ផ្គង់កន្លងមក ប្រមាណ ១០%៕
