រថយន្ត Honda Civic ជំនាន់ទី១១ដែលបានផ្លាស់ប្ដូររូបរាងថ្មីនោះ បានដាក់លក់ជាផ្លូវការហើយនៅប្រទេសថៃ ដែលជាប្រទេសដំបូងគេនៅអាស៊ីអាគ្នេយ៍មានរថយន្តស៊េរីថ្មីនេះលក់លើទីផ្សារ។
Honda Civic លក់នៅប្រទេសថៃ មានចំនួនបីជម្រើស ក្នុងនោះមាន EL, EL+ និង RS ដោយប្រភេទនីមួយៗមានតម្លៃចាប់ពី ២៩ ០០០ដុល្លារ, ចាប់ពី ៣០ ៣០០ដុល្លារ និងតម្លៃចាប់ពី ៣៦ ០០០ដុល្លារ។
រថយន្តដែលដាក់លក់នេះមានប្រើប្រាស់ម៉ាស៊ីន Turbocharged ចំណុះ១,៥លីត្រ អាចផលិតកម្លាំងបាន១៧៨សេះ និងប្រើប្រាស់ប្រអប់លេខ CVT ដែលមានប្រភេទបើកស្តង់ដារ Econ និង Normal សម្រាប់ប្រភេទ EL និង EL+ ខណៈប្រភេទ RS មានបន្ថែមប្រភេទ Sport មួយទៀត។ ចំណែកកម្រិតស៊ីប្រេងនោះគឺ ៥,៨លីត្រ ក្នុងចម្ងាយ១០០គីឡូម៉ែត្រ។
មុខងារសុវត្ថិភាពដែលមានបំពាក់លើរថយន្តជាមួយនឹង Honda Sensing មានដូចជាមុខងារព្រមានពីការប៉ះទង្គិច និងចាប់ហ្វ្រាំងស្វ័យប្រវត្តិ, មុខងារសម្គាល់អ្នកថ្មើជើង និងអ្នកជិះកង់, មុខងារ Adaptive Cruise Control និងមុខងារជាច្រើនទៀត ហើយមានគួបផ្សំជាមួយប្រព័ន្ធ Honda LaneWatch ផងដែរ៕
