រថយន្តអគ្គិសនីរបស់ប្រទេសកូរ៉េ Kia EV6 ស៊េរីឆ្នាំ ២០២២ បានបង្កើតកំណត់ត្រាពិភពលោក Guinness ថ្មី តាមរយៈការបើកបរនៅទូទាំងសហរដ្ឋអាមេរិក ជាមួយនឹងរយៈពេលសាកភ្លើងខ្លីបំផុត បើប្រៀបធៀបជាមួយនឹងរថយន្តអគ្គិសនីដទៃទៀត។
ក្រុមហ៊ុនផលិតរថយន្តខាងលើបានបើករថយន្ត EV6 ពីទីក្រុង New York ទៅ Los Angeles ក្នុងរយៈពេល ៧ ថ្ងៃ ហើយក្នុងអំឡុងពេលធ្វើដំណើរ ២ ៨៨០ម៉ាយ៍ (៤ ៦៣៥គីឡូម៉ែត្រ) រថយន្តនេះត្រូវបានដោតភ្លើងសាកត្រឹមតែ ៧ម៉ោង ១០នាទី និង ១វិនាទី ប៉ុណ្ណោះ។
គួរឲ្យដឹងថា ជាមួយនឹងថេរៈវេលាខាងលើ វាបានអនុញ្ញាតឲ្យរថយន្ត Kia EV6 ផ្តួលម្ចាស់កំណត់ត្រាពីមុន ដែលកាន់កាប់ដោយ Tesla ដែលប្រើពេល ១២ម៉ោង ៤៨នាទី និង ១៩វិនាទី។
លោក Russell Wager អនុប្រធានផ្នែកទីផ្សារនៅក្រុមហ៊ុន Kia America បាននិយាយថា “ការបង្កើតកំណត់ត្រារបស់ EV6 គឺជាសញ្ញាចុងក្រោយបង្អស់ដែលបង្ហាញថា Kia នឹងក្លាយជាអ្នកនាំមុខគេនៃរថយន្តអគ្គិសនី”៕
