រថយន្ត Kia Sportage ស៊េរីឆ្នាំ២០២២ ដែលផ្លាស់ប្តូររូបរាងថ្មីទាំងស្រុង បានបង្ហាញខ្លួនជាផ្លូវការ សម្រាប់ទីផ្សារអឺរ៉ុប ខណៈពេលដែលទីផ្សារសហរដ្ឋអាមេរិក នៅតែបន្តប្រើរូបរាងចាស់តាំងពីឆ្នាំ២០១៥ មក។
រថយន្ត Kia Sportage ឆ្នាំ២០២២ ថ្មី មានការឌីហ្សាញផ្នែកខាងមុខរឹតតែកាច ខណៈខាងក្រោយកាន់តែស្ព័រ មើលទៅពិតជាទាក់ទាញមែនទែន។ មិនតែប៉ុណ្ណោះ វាក៏បានអាប់ដេតកាប៊ីនខាងក្នុងយ៉ាងខ្លាំងគួរឲ្យកត់សម្គាល់ដែរ ហើយត្រូវបានដាក់លក់ក្នុងតម្លៃចាប់ពី ២៦ ៧៤៥ផោន ឬប្រហែល ៣៥ ៦០០ដុល្លារ។
រថយន្ត Kia Sportage ប្រភេទ Base Model នឹងមានបំពាក់ម៉ាស៊ីនសាំង ចំណុះ ១,៦លីត្រ មានកម្លាំង ១៤៨សេះ តែក៏មានជម្រើសម៉ាស៊ីនផ្សេងទៀត ដូចជា ចំណុះ ១,៦លីត្រ T-Gdi ប្រើសាំង មានកម្លាំង ១១៣សេះ និង ម៉ាស៊ីនម៉ាស៊ូតចំណុះ ១,៦លីត្រ CRDi មានកម្លាំង ១៤៨សេះ។ រីឯប្រអប់លេខវិញ មានទាំងជម្រើសលេខដៃ ៦វគ្គ និង លេខអូតូ ៧វគ្គ ព្រមទាំងប៉ុងមួយ និងជម្រើសប៉ុងពីរ ទៀតផង។
មិនតែប៉ុណ្ណោះ រថយន្ត Kia Sportage ឆ្នាំ២០២២ ក៏មានជម្រើសប្រភេទប្រើម៉ាស៊ីន Hybrid ដែលមានកម្លាំង ២២៦សេះ ខណៈប្រភេទប្រើម៉ាស៊ីន Plug-in Hybrid មានកម្លាំង ២៦១សេះ នឹងត្រូវបង្ហាញខ្លួននាពេលក្រោយ ក្នុងឆ្នាំ២០២២៕
