[បរទេស] កាលពីពេលថ្មីៗ កន្លែងទៅនេះ ក្រុមហ៊ុនផលិតរថយន្ត General Motors បានធ្វើការបញ្ជាក់ថា ខ្លួននឹងសហការជាមួយក្រុមហ៊ុន Tesla ដើម្បីចែករំលែកសិទ្ធិប្រើប្រាស់ស្ថានីយ៍សាកថ្មល្បឿនលឿន Supercharger ចំនួន ១២ ០០០ ទីតាំង នៅអាមេរិកខាងជើងចាប់ពីឆ្នាំ ២០២៤ ។
គួរឲ្យដឹងថា នាពេលបច្ចុប្បន្ននេះ ស្តង់ដារសាកថ្មរបស់អាមេរិកខាងជើង (NACS) ត្រូវបានគេរំពឹងថានឹងក្លាយទៅជាស្តង់ដារសាកថ្មដ៏ពេញនិយមមួយនៅក្នុងតំបន់នេះក្នុងពេលឆាប់ៗនេះ បន្ទាប់ពីក្រុមហ៊ុន General Motors គឺជាឈ្មោះបន្ទាប់ដើម្បីបញ្ជាក់ពីការដាក់ពាក្យរបស់ខ្លួនលើរថយន្តអគ្គិសនី លើកលែងតែក្រុមហ៊ុន Tesla ក្រុមហ៊ុនផលិតរថយន្តអគ្គិសនីផ្សេងទៀតកំពុងប្រើឆ្នាំងសាក CCS ជំនួសឲ្យស្តង់ដារសាក NACS ដែលត្រូវបានគេដឹងថាស្តង់ដារសាកថ្ម CCS មានប្រជាប្រិយភាពខ្លាំងនៅលើរថយន្តអគ្គិសនីនៅក្នុងទីផ្សារអឺរ៉ុប និងអាមេរិក។
នៅក្នុងការអភិវឌ្ឍន៍នាពេលថ្មីៗនេះ ក្រុមហ៊ុន Ford គឺជាម៉ាកយីហោដំបូងគេដែលបញ្ជាក់ពីភាពជាដៃគូជាមួយក្រុមហ៊ុនរថយន្តអគ្គិសនី Tesla ដើម្បីចែករំលែកការចូលទៅកាន់ស្ថានីយ៍សាកល្បឿនលឿន Supercharger ដោយប្រើស្តង់ដារសាក NACS ។
ជាមួយគ្នានេះ ក្រុមហ៊ុន General Motors ក៏មានគម្រោងផ្តល់ជូននូវអាដាប់ទ័រ CCS-to-NACS នាពេលអនាគត ដែលអនុញ្ញាតឲ្យអតិថិជនរបស់ខ្លួនអាចសាករថយន្តអគ្គិសនីរបស់ពួកគេនៅស្ថានីយ៍សាកថ្មលឿនណាមួយ និងមិនកំណត់ចំពោះបង្គោលសាកដែលផ្គត់ផ្គង់ដោយ Tesla នោះទេ។
ទន្ទឹមនឹងនេះ លោក Mary Barra នាយកប្រតិបត្តិនៃក្រុមហ៊ុន General Motors បានបញ្ជាក់ថា ចក្ខុវិស័យរបស់ក្រុមរថយន្តនេះគឺផលិតរថយន្តអគ្គិសនីរាប់លានគ្រឿង ដែលលាតសន្ធឹងតាមប្រភេទ និងតម្លៃផ្សេងៗគ្នា និងបង្កើតប្រព័ន្ធអេកូឡូស៊ីដែលជួយលើកកម្ពស់ការប្រើប្រាស់រថយន្តអគ្គិសនី ៕
