[ទីផ្សារបរទេស] កាលពីថ្មីៗនេះក្រុមហ៊ុន BYD បានរៀបចំកម្មវិធីសន្នីសីទកាសែតមួយនៅឯទីក្រុងតូក្យូប្រទេសជប៉ុន ដើម្បីប្រកាសអំពីផែនការលក់រថយន្តអគ្គិសនីតូច Atto 3 នៅទីផ្សារនេះចាប់ពីឆ្នាំ២០២៣ ជាមួយគម្រោងចេញលក់រថយន្តពីរម៉ូដែលទៀតផងដែរនៅឆ្នាំដដែល។
Atto 3 គឺជារថយន្ត SUV បែបស្ព័រ ជាប្រភេទរថយន្តប្រើថាមពលអគ្គិសនីសុទ្ធ ហើយរថយន្តពីរម៉ូដែលទៀតគឺរថយន្ត Dolphin និងរថយន្ត Seal ដោយលក្ខណៈសម្បត្តិ, តម្លៃលក់ ក៏ដូចជាគោលដៅនៃការលក់នៃរថយន្តទាំងនេះ គឺនៅមិនទាន់ប្រកាសចេញនៅឡើយទេ។
បច្ចុប្បន្ននៅប្រទេសជប៉ុន រថយន្តអគ្គិសនីមានចំណែកប្រមាណ ១% ប៉ុណ្ណោះនៃចំនួនលក់រថយន្តប្រចាំឆ្នាំ ខណៈដែលរដ្ឋាភិបាលបានដាក់គោលដៅថាត្រឹមឆ្នាំ២០៣៥ រថយន្តដែលលក់លើទីផ្សារត្រូវតែជារថយន្តអគ្គិសនី និងជារថយន្ត PHEV។ ត្បិតថាជប៉ុនទើបចាប់ផ្ដើមយកចិត្តទុកដាក់លើការអភិវឌ្ឍន៍រថយន្តអគ្គិសនី ប៉ុន្តែមានក្រុមហ៊ុនបរទេសដូចជា Tesla និង Volkswagen បានត្រៀមខ្លួនរួចរាល់ក្នុងការវាយលុកទីផ្សារនេះ។
គួរដឹងថា BYD មានលក់រថយន្តអគ្គិសនី និងរថយន្តប្រភេទពាណិជ្ជកម្មនៅទីផ្សារជាង ៧០ ប៉ុន្តែរថយន្តអគ្គិសនីបានផ្ដោតការលក់ជាសំខាន់តែនៅទីផ្សារប្រទេសចិនប៉ុណ្ណោះ។ ទើបតែប៉ុន្មានឆ្នាំចុងក្រោយនេះ BYD ចាប់ផ្ដើមលក់រថយន្តអគ្គិសនីមួយចំនួននៅទីផ្សារបរទេសមានដូចជាប្រទេសន័រវេស, សិង្ហបុរី, ប្រេស៊ីល និងកូឡុំប៊ីជាដើម។
ក្នុងឆ្នាំ២០២១ ចំនួនលក់រថយន្តដែលប្រើប្រាស់ថាមពលថ្មីរបស់ BYD ដែលមានរាប់បញ្ចូលរថយន្តអគ្គិសនីសុទ្ធ និងរថយន្ត PHEV មានចំនួនជិត ៦០ម៉ឺនគ្រឿង ដែលក្នុងនោះការលក់នៅប្រទេសចិនមានចំណែកជាង ៩០%៕
