ក្រុមហ៊ុន Chevrolet បានប្រកាសចេញរថយន្ត Camaro ស៊េរីឆ្នាំ២០២១ ជាផ្លូវការដោយស្ងាត់ៗ សម្រាប់ទីផ្សារសហរដ្ឋអាមេរិក។
មូលហេតុមួយក្នុងសម្រេចការដាក់ចេញរថយន្តថ្មីយ៉ាងស្ងៀមស្ងាត់នេះ អាចមកពី Camaro ថ្មីមិនមានផ្លាស់ប្តូរតិចតួចបំផុត សម្រាប់ស៊េរីឆ្នាំ២០២១ ពោលគឺកែកុនការឌីហ្សាញបន្តិច និងបន្ថែមមុខងារ Android Auto និង Apple CarPlay ឥតប្រើខ្សែ។
ទោះជាយ៉ាងណា រថយន្ត Chevrolet Camaro ផ្តល់ជម្រើសម៉ាស៊ីនចំនួន ៤ គឺ ចំណុះ ២,០លីត្រ turbocharged ទំហំ ៤ស៊ីឡាំង មានកម្លាំង ២៧៥សេះ, ម៉ាស៊ីនចំណុះ ៣,៦លីត្រ V6 កម្លាំង ៣៣៥សេះ, ម៉ាស៊ីនចំណុះ ៦,២លីត្រ V8 កម្លាំង ៤៥៥សេះ និងចុងក្រោយបង្អស់គឺ ម៉ាស៊ីនចំណុះ ៦,២លីត្រ supercharged V8 មានកម្លាំង ៦៥០សេះ។
Chevrolet Camaro ឆ្នាំ២០២១ ត្រូវបានដាក់លក់ក្នុងតម្លៃចាប់ពី ២៥ ៩៩៥ដុល្លារ នៅលើទីផ្សារសហរដ្ឋអាមេរិក សម្រាប់ម៉ូដែល 1LS Coupe (Base Model) និងឡើងរហូតដល់ ៧១ ៥៩០ដុល្លារ សម្រាប់ម៉ូដែល ZL1 Convertible៕
